Лубян урман-техника көллияте студентлары "Яшь профессионаллар" VII Илкүләм чемпионаты финалында катнаша
Бүген Казан шәһәрендә "Яшь профессионаллар" VII Илкүләм чемпионаты (WorldSkills Russia) финалының өченче, тәмамлану көне уза. Ярышлар 6 мәйданчыкта, шул исәптән "Казан Экспо" Халыкара күргәзмәләр үзәге базасында үткәрелә.
Халыкара күргәзмә үзәгендә 91 компетенция, шулай ук "Киләчәк һөнәрләре" дип аталган Future Skills блогының 23 югары технологияле компетенциясе тәкъдим ителгән. WorldSkills Russia Juniors (14-16 яшьлек мәктәп укучылары) яшүсмерләре 48 компетенция буенча ярыша, "Зирәк күнекмәләр" чемпионатында катнашучылар (өлкәннәр 50+) 26 компетенция буенча көч сынаша. Казанда "Яшь профессионаллар (WorldSkills Russia)" VII Илкүләм чемпионаты финалында 1500 артык конкурсант катнашты. Россиядән катнашучылар белән бергә мәйданчыкта чит ил спортчылары да чыгыш ясый – россиялеләрнең әзерлек дәрәҗәсе белән дөньяның 26 иленнән 131 конкурсант үз күнекмәләрен чагыштыра.
"Ландшафт дизайны" компетенциясе буенча ярышларда Лубян урман-техника көллиятенең ике студенты – Станислав Козырев һәм Руслан Зайцев катнаша. "Стас һәм Руслан 2018 елда илкүләм җыелма команда составына керде, 10 конкурсант арасында яхшы нәтиҗәләрне күрсәттеләр, – дип сөйләде көллият укытучысы, тренер Наил Сираҗетдинов. – Зур эш башкарылды, егетләр бер ел буе Мәскәү өлкәсендәге үзәк базасында әзерләнде. Хәзер алар 22 августтан 27 августка кадәр Казанда узачак дөнья чемпионатында катнашу өчен Мәскәү командасы белән көрәшә. Нәтиҗәләр инде иртәгә, 24 майда билгеле булачак".