Урман тармагы ветераннары: Ананьева Анастасия Никоновна
Татарстан АССР төзелүнең 100 еллыгын бәйрәм итү кысаларында «Урман тармагы ветераннары» рубрикасы дәвам итә. Бүген аның герое – Бөек Ватан сугышы ветераны Ананьева Анастасия Никоновна.
Анастасия Ананьева 1923 елның 22 нче мартында Харьковск өлкәсе Радьково авылында (Украина) туа. Балачакта аңа күп авырлыклар кичерергә туры килә – әнисе бик иртә вафат була, әтисе яңа гаиләгә алганчы, балалар йортлары буйлап йөрергә туры килә. Мәктәпне тәмамлаганнан соң, ул элемтәче белгечлеген алу өчен ФЗӨ укырга керә, училищены уңышлы тәмамлый һәм эшли башлый.
1941 елның 19 нчы июлендә Анастасия Ананьева Кызыл Армия сафларына алына, анда элемтә бүлегендә хезмәт итә, төрле дәрәҗәдәге хәрби бүлекчәләр белән элемтәдә тора. Шул ук елның декабрендә Сталинградтагы телеграфистлар белән була һәм биредә бик озак айлар буенча Иделдә бу шәһәрне саклау һәм азат итү эшләрендә катнаша.
«Безнең штаб яхшы якланган иде, алманнар округны бомбага тотты, безне күрми калдылар. Әлеге урында тәмам беркем барлыгын да белеп алмасыннар өчен, төннәрен без бер-беребезне алмаштырып тордык, – дип искә ала Анастасия Никоновна. – Тормыш ритмы бик киеренке булды, безгә көн саен тәвәккәл булу таләп ителә иде, чөнки Сталинградны гел бомбага тоттылар. Сталинград сугышы тәмамланганнан соң без Әстерханга килеп җиттек. Тиздән 28 нче удар армиясе составында безнең 6 нчы аерым элемтә полкы Калмык даласы аша һөҗүмгә күчте. Анда аеруча авыр булды. Торыр урын юк, ярымҗимерек сарык абзарларында, соңыннан землянкаларда эшләдек. Сусыз бик кыен булды – шунысы бик начар иде. Гаскәриләр Элисту шәһәрен азат иткәч, Калмык эпопеясы тәмам булды».
Ветеран сүзләренә караганда, аннары Литва, Кенигсберг, Польша, Берлин булган... Берлин шәһәрен алганда сугышта күрсәткән хәрби аерымлыклары өчен ул хезмәт иткән полк Берлин исеменә лаек була.
Сугышта Анастасия Ананьева үзенең булачак ире белән таныша. 1944 елда ул хезмәт иткән полкка радиоразведка бүлекчәсенә яшь элемтәче, Татарстан АССР Тәтеш шәһәрендә туган Николай Георгиевич Ананьев килә.
Сугыштан соң Анастасия Ананьева ире белән Тәтеш шәһәренә килә, Тәтеш механикалаштырылган урман хуҗалыгында эш башкаручы вазыйфасында эшли. Николай Георгиевич белән бергә алар озын һәм бәхетле гомер кичерә. Кызганычка, башка Бөек Ватан сугышы ветераннары кебек үк, ире вафат инде.