2020 елның 27 нче маенда «Автономияле Татар Социалистик Совет Республикасы турында»гы декрет имзалануга 100 ел тулды
Бүген, 27 нче майда, «Автономияле Татар Социалистик Совет Республикасы турында»гы декрет – Россия Совет Федератив Социалистик Республикасы составында Автономияле Татар Социалистик Республикасы төзелү турындагы документ имзалануга 100 ел тулды. Әлеге документка РСФСР Халык Комиссарлары Советы Рәисе Владимир Ленин һәм Бөтенроссия Үзәк Башкарма Комитеты Рәисе Михаил Калинин кул куя.
Республиканың беренче Хөкүмәте – АТССР Халык Комиссарлары Советы, ә аның җитәкчесе 26 яшьлек революционер һәм сәясәт эшлеклесе Сәхибгәрәй Сәет-Галиев була. Башта АТССР 10 кантонга бүленә: Арча, Бөгелмә, Буа, Лаеш, Мамадыш, Минзәлә, Свияжск, Спас, Тәтеш һәм Чистай. 1921 елда Әгерҗе, Алабуга һәм Чаллы кантоннары төзелә.
Яңа республиканың аякка басуы, замандашлар фаразлаганча, күпкә катлаулырак булган. Ул чорда АТССР эмиграция һәм милли интеллигенциянең бер өлешен югалту, ачлык һәм коллективлашу авырлыкларын кичерә. Бөек Ватан сугышы елларында да аның өлешенә авыр сынаулар туры килә. Сугышның барлык фронтларында да сугышта 700 меңгә якын кеше катнаша.
Бүген Татарстан Республикасы – Россиянең икътисадый яктан иң алга киткән төбәкләренең берсе. Республика Россия Федерациясенең эре индустриаль районы үзәгендә, илнең көнчыгышын, көнбатышын, төньягын һәм көньягын тоташтыручы мөһим магистральләр киселешендә урнашкан. Татарстан бай табигый ресурсларга, куәтле һәм диверсификацияләнгән сәнәгатькә, югары интеллектуаль потенциалга һәм бик күп югары квалификацияле белгечләргә ия.
Туган көнең белән, Газиз Татарстан! Республикага чын күңелдән тынычлык һәм татулык, ә аның халкына нык сәламәтлек, игелек һәм иминлек телибез!