Kazan Digital Week мәйданчыгында киберкуркынычсызлык өлкәсендәге казанышлар турында сөйләшәчәкләр
21-24 сентябрь көннәрендә Kazan Digital Week-2020 халыкара форумы узачак, ул онлайн-мәйданчыкта бөтен дөньядан ИТ-өлкәнең йөзләгән экспертларын җыячак.
Форум кысаларында панель дискуссияләр, түгәрәк өстәлләр, техник турлар, күргәзмәләр һәм нетворкинг-клуб узачак. Чарада катнашучылар, аерым алганда, «Яңа вакытның киберкуркынычсызлыгы» темасына фикер алышачак. Алар мәгълүматны яклауның техник чаралары һәм киберкуркынычсызлык сервисларын куллану практикасын караячак.
Kazan Digital Week форумындагы тагын бер вакыйга – ITS Forum-Kazan VI халыкара фәнни-гамәли конференциясе. Анда интеллектуаль транспорт системаларының һәм тормыш эшчәнлеге иминлеген тәэмин итүдә вәзгыяти үзәкләрнең роле каралачак.
Моннан тыш, IT-белгечләр банклар өчен финанс технологияләренең актуаль юнәлешләренә кагылачак һәм корпоратив бурычлар һәм стартаплар арасында тотрыклы бизнес-процессларны трансформацияләүгә юнәлдерелгән идеяләрне анализлаячак.
Форумда катнашу өчен https://kazandigitalweek.com рәсми сайтында теркәлергә кирәк.