Быел Татарстанда иминият фондына салу өчен 55 кг орлык әзерләнәчәк

2021 елның 28 июне, дүшәмбе

Быел Татарстан Республикасында урман үсемлекләре орлыкларының иминият фонды тулыландырылачак. Барлыгы 55 кг орлык әзерләү планлаштырыла.

Исегезгә төшерик, мондый фондларга корткычлар белән зарарланмаган һәм патоген микрофлорасы булмаган, башлыча даими урман-орлык базасы объектларында, югары продуктив утыртмаларда әзерләнгән, үсеш алу энергиясе югары күрсәткечләргә ия 1 нче класс сыйфатына караган орлыклар салына.

Татарстан Республикасы урман үсемлекләре орлыкларының иминият фонды Саба муниципаль районының Лесхоз бистәсендә урнашкан. Хәзерге вакытта фондта 295 кг ылыслы токым орлыгы бар, шул исәптән 176 кг – нарат, 105 кг – чыршы, 14 кг – карагай орлыгы.