Рөстәм Миңнеханов Татарстан Урман хуҗалыгы министрлыгы өчен 28 берәмлек урман патруле автомобиле алуга сертификат тапшырды
Бүген С.Сәйдәшев исемендәге ДБКЗ каршындагы мәйданда ТР Урман хуҗалыгы министрлыгы карамагындагы учреждениеләргә – урманчылыкларга урман патруле техникасын тапшыру тантанасы булды. Анда Татарстан Республикасы Рәисе Рөстәм Миңнеханов, Татарстан Республикасы урман хуҗалыгы министры Равил Кузюров һ.б. катнашты. Әлеге техниканы тапшыру «Экология» илкүләм проектын тормышка ашыруга ярдәм итәчәк.
Үзенең чыгышында Рөстәм Миңнеханов бүген тапшырылган автомобильләрнең федераль программа кысаларында сатып алынганлыгы турында искәртте. Ул РФ Табигать ресурслары һәм экология министрлыгына рәхмәт белдерде һәм урманчылар алган заманча транспорт чараларының нәтиҗәле эш өчен мөһим булуын билгеләп үтте. Бу безгә урманнарыбызны саклап калырга һәм аларны арттырырга мөмкинлек бирәчәк, диде Рөстәм Миңнеханов.
«Республикада урманнарны саклауга бәйле барлык мәсьәләләр дә тиешле дәрәҗәдә үтәлә дип ышанам», – дип белдерде Рөстәм Миңнеханов.
Татарстан Рәисе шулай ук урман тармагы белгечләренә аларның эше өчен рәхмәт белдерде. «Без урман хуҗалыгы хезмәткәрләре белән горурланабыз. Сезгә республикабыз файдасына алга таба да чәчәк атуыгызны телим», – дип нәтиҗә ясады ул.
Урманчылыкларга Россия Федерациясенең «Урман хуҗалыгын үстерү» дәүләт программасы кысаларында сатып алынган 28 данә LADA Niva legend урман патруле автомобиле тапшырылды. Әлеге техника янгын шартларын мониторинглау, урманнарны патрульләү, урман утыртмаларын законсыз кисү очракларын һәм урман законнарын бозуны кисәтү өчен кулланылачак.