ТР Урман хуҗалыгы министрлыгында агачны законсыз әзерләүне, транспортлауны, эшкәртүне, сатуны һәм экспортлауны кисәтү һәм булдырмау мәсьәләләре каралды
Бүген Министрлыкта Татарстан Республикасында агач материалларын законсыз әзерләү, транспорт белән күчерү, эшкәртү, сату һәм чит илгә чыгаруны кисәтү һәм туктату мәсьәләләре буенча ведомствоара комиссиясе утырышы булды. Киңәшмә ТР урман хуҗалыгы министрының беренче урынбасары Илгизәр Зарипов рәислегендә видеоконференция режимында узды.
Утырышта төп доклад белән Министрлыкның дәүләт контроле һәм күзәтчелеге бүлеге башлыгы Айрат Әхмәров чыгыш ясады. Ул катнашучыларны агач әзерләү һәм агач әйләнеше өлкәсендәге хокук бозуларны кисәтү, ачыклау һәм кисәтү буенча гамәлгә ашырыла торган чаралар белән таныштырды.
«Ел башыннан урман фонды җирләрендә 23,7 мең патрульлек, 3,2 мең профилактик чара үткәрелде, шул исәптән 2,5 мең мәгълүмат җиткерелде, – дип хәбәр итте ул. – Дәүләт урман инспекторларының системалы эшләве аркасында без гаеплеләрне вакытында ачыклый һәм аларны административ яки җинаять җаваплылыгына тарта алабыз».
Айрат Әхмәров сүзләренчә, быелның 1 яртыеллыгында Административ хокук бозулар турында РФ кодексының 8.28 статьясы буенча административ хокук бозулар турында 72 эш кузгатылган, гомуми суммасы 169 мең сумлык штрафлар салынган. 152 мең сум (90%) түләттерелгән.