Дәүләт Советында урман законнарын гамәлгә ашыру мәсьәләләре буенча фикер алыштылар
Бүген Дәүләт Советында Экология, табигатьтән файдалану, агросәнәгать һәм азык-төлек сәясәте комитеты утырышында парламентарийлар урман законнарын гамәлгә ашыру мәсьәләләре буенча фикер алыштылар. Аерым алганда, Комитет әгъзалары урманнарны куллану, үрчетү, саклау, урман янгыннарыннан саклау өлкәсендәге урман законнарының үтәлеше турында доклад тыңладылар, шулай ук урманнардан файдалану турындагы республика законына үзгәрешләр кертү турындагы закон проектын карадылар.
Төп мәсьәлә буенча мәгълүматны Татарстан Республикасы урман хуҗалыгы министрының беренче урынбасары Илгизәр Зарипов тәкъдим итте. «Бүгенге көндә ясалма урман торгызу мәйданының киселгән һәм һәлак булган урман утыртмалары мәйданына нисбәте 163% тәшкил итте, – дип билгеләп үтте министр урынбасары, – Быел 3,6 мең гектар мәйданда – урман торгызу эшләре, шул исәптән 1,4 мең гектар мәйданда ясалма урман торгызу эшләре башкарылды».
2023 елда 11,5 мең килограмм төп урман барлыкка китерүче токым орлыклары, шул исәптән 700 килограммнан артык ылыслы орлыклар әзерләнгән. Шулай ук хисап елында 12 млн.данә ябык тамыр системасы булган стандарт утырту материалы үстерелгән.
Быел республикада 1 апрельдән 13 октябрьгә кадәр игълан ителгән янгын куркынычы сезоны турында сөйләгәндә, Илгизәр Зарипов, «җиңел булмаса да», штат режимында узды, дип билгеләде. Иртә килгән яз һәм аномаль эссе җәй башлану сәбәпле, 6 урманда гражданнар өчен һәм транспорт чаралары белән керүгә карата чикләүләр кертелде. «Бу чорда урман фондына чиктәш территорияләрдә 55,98 гектар мәйданда 942 янгын очрагы теркәлде. Шулай ук агымдагы елның 25 маенда Әлмәт урманчылыгы территориясендә 0,5 гектар мәйданда 1 урман янгыны теркәлде», – дип ассызыклады докладчы.
Министр урынбасары урман хуҗалыгында цифрлаштыруның мөһим аспектларын да билгеләп үтте. Хәзерге вакытта Министрлык тарафыннан күрсәтелә торган барлык дәүләт хезмәтләре электрон төргә күчерелгән һәм дәүләт хезмәтләренең бердәм һәм төбәк порталлары аша күрсәтелә. «Бүгенге көндә барлык урман хуҗалыгы җирләре цифрлаштырылды – бу 1,233 млн гектардан артык урман фонды җирләре», – дип йомгаклады докладчы.
Мәгълүматны тыңлап, депутатлар һәм экспертлар советы әгъзалары фикер алышуга күчтеләр. Комитет рәисе Азат Хамаев, депутатлар Ләлә Кадыйрмәтова, Николай Нефедов, Николай Атласов тармакны кадрлар белән тәэмин итү, урман хуҗалыгы хезмәткәрләренең хезмәт хакы дәрәҗәсе, питомниклар саны һәм утырту материалы үстерү мәсьәләләре белән кызыксындылар. Илгиз Әхмәтов сүзләренчә, тармакта 2,5 мең хезмәткәр эшли, Урман хуҗалыгы министрлыгының үзәк аппаратында вакантлы эш урыннары юк, гомумән, тармакка килгәндә, 60-70 вакансия ачылган, бу 64 ведомство карамагындагы учреждение эшендә, уртача хезмәт хакы 34 мең сум тәшкил итә.
«Министрлык карамагындагы һәм республиканың барлык муниципаль районнарында диярлек урнашкан 51 базислы питомникта 34 млн.данәдән артык утырту материалы үстерелде, ә безнең ихтыяҗ – 20-25 млн данә, республикада утырту материалы җитмәү куркынычы юк», – дип ассызыклады Илгизәр Зарипов.
ТР Урман хуҗалыгы министрлыгының мәгълүматын Комитет, берничә тәкъдимне әйтеп, игътибарга алды. Аерым алганда, муниципаль районнарга урманга якын территория белән идарә итүче затларны ачыклау һәм алар тарафыннан урманнарда янгын куркынычсызлыгы кагыйдәләрен үтәү, коры үлән үсемлекләреннән, җитештерү һәм куллану калдыкларыннан һәм территория яки урман чикләреннән ким дигәндә 10 метр киңлектәге полосада башка янучан материаллардан чистарту буенча эшләрне дәвам итәргә киңәш ителде.
Бүген профильле комитет әгъзалары «ТРда урманнардан файдалану турында» ТР Законына үзгәрешләр кертү хакында республика закон проектын хупладылар. Закон проекты республика законнарын РФ законнарына кертелгән үзгәрешләргә туры китерүгә юнәлдерелгән. Сүз урманнарны янгыннан саклауны камилләштерү һәм ашыгыч йогынты ясау буенча федераль резервны җәлеп итү нәтиҗәлелеген арттыру турында бара. 2024 елның 1 гыйнварыннан Россия Федерациясе субъектларының югары вазыйфалы затлары ил субъекты территориясендә урманнарны янгынга каршы төзекләндерү планнарын раслый. Әлеге план Федераль урман хуҗалыгы агентлыгы белән килештереп раслана.
Шуңа бәйле рәвештә, Татарстан Республикасы Рәисенең 22-ТРЗ номерлы ТР Законының 1 статьясында беркетелгән урман мөнәсәбәтләре өлкәсендәге вәкаләтләренә үзгәрешләр кертелә. Моннан тыш, ТР Урман хуҗалыгы министрлыгына беркетелгән вәкаләтләр дә төгәлләштерелә. Әлеге республика башкарма хакимият органы вәкаләтләренә, шул исәптән, Татарстан Республикасы территориясендә урманнарны янгынга каршы төзекләндерү планын эшләүне, шулай ук урманчылыклар территориясендә урманнарны янгынга каршы төзекләндерү планын эшләүне һәм раслауны кертү күздә тотыла. Моннан тыш, закон проекты гражданнарга уңайлы булсын өчен, гражданнарның үз ихтыяҗлары өчен, аукционнар үткәрмичә, урман фонды җирләрендә урнашкан урман утыртмаларын сатып алу-сату килешүен төзү буенча дәүләт хезмәте күрсәтү вакытын 15 көннән 10 эш көненә кадәр кыскартуны да күздә тота.
Татарстан Республикасы Дәүләт Советы матбугат хезмәте