Урманга бүген һәркемнән ярдәм кирәк!

Агач утырту буенча “Яшә, урман!” көзге акциясе бөтен ил буенча 5 октябрьдә узачак. Татарстанда бу акциядә Президент Рөстәм Миңнеханов, Премьер-министр Илдар Халиков, район, министрлык һәм ведомство җитәкчеләре катнашачак.

Агымдагы елның язында Татарстан Республикасы Урман хуҗалыгы министрлыгының урман утыртуга чакыруына 15 меңгә якын кеше кушылды. 268 гектар гомуми мәйданда, шул исәптән 158 га дәүләт урман фондында, 110 га башка категория җирләрендә урман посадкалары, 51 га мәйданда истәлекле аллеялар утыртылды. Барлыгы 1 млн 248 мең данә агач үсентесе утыртылды. Әлбәттә, бу бик зур сан түгел. Урман бүгенге көндә илебезнең һәр кешесеннән ярдәм көтә. Без күбрәк урман утырткан саен, планетада тормыш яхшырак булачак!