Лубян урман-техник көллиятендә яшьләр сәясәтен гамәлгә ашыру мәсьәләләре буенча түгәрәк өстәл узды
«Лубян урман-техник көллияте» дәүләт бюджет һөнәри белем бирү учреждениесендә яшьләр сәясәтен гамәлгә ашыру мәсьәләләре буенча түгәрәк өстәл узды. Фикер алышуда ТР яшьләр эшләре министры Ринат Садыйков, район яшьләр эшләре һәм спорт идарәсе җитәкчесе Илсур Кәшапов, көллият директорының тәрбия эшләре буенча урынбасары Наталья Сираҗетдинова, көллият студентлары катнашты.
Түгәрәк өстәл утырышы кысаларында Ринат Садыйков көллият активистларына рәхмәт хатлары тапшырды.
Студентлар советы җитәкчесе Ләйсән Җамалетдинова көллият студентлары белән бергәләп эшләү турында сөйләде.
«Безнең студентлар бик актив, алар төрле республика форумнарында, чараларында катнашалар, шулай ук волонтерлар да булып торалар. 2023 елның гыйнварында студентлар отрядлары штабы ачылды. Аның составына „Лагуна“ һәм „Маяк“, аннары „Патагония“ төзелеш отрядлары керде. Камчаткадагы заводта тугыз студент эшләде. Ә быел „Алабуга“ политцехында 16 кеше эшләде», — дип хәбәр итте ул.
«Без Татарстан яшьләренең тормышын уңайлырак итү турында уйлыйбыз. Шуңа күрә без сезнең белән төрле темаларга очрашулар оештырабыз һәм әңгәмәләр үткәрәбез. Ә яшьләрнең максатлары һәм ихтыяҗлары бик зур. Аларны гамәлгә ашыру өчен шартлар һәм уңайлы мохит тудырырга кирәк. Моннан тыш, без авыр тормыш хәлендә профилактик исәптә торучыларга да ярдәм итү турында уйларга тиеш», – диде Ринат Садыйков.