ТР Урман хуҗалыгы министрлыгында беренчел профсоюз оешмасының 5 еллык эшенә йомгаклар ясалды
Бүген ТР Урман хуҗалыгы министрлыгында беренчел профсоюз оешмасының хисап-сайлау җыелышы булды. Видеоконференция режимында узган чарада ТР урман хуҗалыгы министры урынбасары Рәис Гомәров, РФ Дәүләт учреждениеләре һәм җәмәгать хезмәте хезмәткәрләре гомумроссия профсоюзының Татарстан республика оешмасы рәисе Ольга Калашникова, Министрлыкның структур бүлекчәләре һәм ведомствога караган оешмалары җитәкчеләре һәм белгечләре катнашты.
Җыелышта төп докладлар белән беренчел профсоюз оешмасы рәисе, оештыру эше бүлеге җитәкчесе Наталья Тюкаева һәм профсоюзның ревизия комиссиясе әгъзасы, икътисад, дәүләт заказын урнаштыру һәм түләүләр белән идарә итү бүлеге башлыгы урынбасары Артем Николаев чыгыш ясады.
Наталья Тюкаева беренчел профсоюз оешмасы эшчәнлегенең төп юнәлешләре һәм 2020-2024 елларда ирешелгән нәтиҗәләр турында сөйләде. Ул хезмәтне саклау, социаль гарантияләр белән тәэмин итү, ташламалар һәм компенсацияләр түләү, шулай ук мәдәни-массакүләм эш мәсьәләләренә тукталды.
«Хисап чоры дәвамында барлык билгеләнгән гарантияләр һәм компенсацияләр тулы күләмдә бирелде, шул исәптән профсоюз әгъзаларының 14 яшькә кадәрге балаларын яңа ел бүләкләре белән тәэмин итү, спартакиадада катнашучыларга өстәмә ял көннәре бирү, авыр тормыш хәленә бәйле рәвештә хезмәткәрләргә матди ярдәм түләү, – дип хәбәр итте Наталья Тюкаева. – Республиканың урманчылык тармагын үстерү юнәлешендә хезмәт куйган ветераннарга да аерым игътибар бирелде».
«Профсоюз эшчәнлегенең тагын бер юнәлеше мәдәни-массакүләм эш булды. Берничә чара оештырылды, алар арасында «Урман чаңгы юлы» спартакиадасы, «Мәктәпкә җыенырга ярдәм ит» акциясе, төрле конкурслар, Ватанны саклаучылар көне, Халыкара хатын-кызлар көне, Балаларны яклау көне кысаларындагы чаралар», - дип өстәде ул.
Артем Николаев профсоюзның ревизия комиссиясенең 2020-2024 еллардагы эше турында хисап бирде.
Аннары Рәис Гомәров һәм Ольга Калашникова чыгыш ясадылар.
Рәис Гомәров Россия Федерациясе дәүләт учреждениеләре һәм җәмәгать хезмәте хезмәткәрләренең гомумроссия профсоюзы республика оешмасына соңгы 5 ел дәвамында уңышлы хезмәттәшлек итүләре өчен рәхмәт белдерде.
«Министрлык һәм ведомство карамагындагы учреждениеләр профсоюзлары рәисләренә һәм әгъзаларына да нәтиҗәле хезмәтләре һәм инициативаларны һәм проектларны гамәлгә ашыруда актив катнашулары өчен ихлас рәхмәтемне белдерәсем килә, – диде министр урынбасары. – Ышанам ки, киләчәктә без белгечләрнең хезмәт һәм яшәү шартларын яхшырту өчен тагын да күбрәк эшли алачакбыз».
Ольга Калашникова катнашучыларны Россия Федерациясе дәүләт учреждениеләре һәм җәмәгать хезмәте күрсәтү хезмәткәрләренең гомумроссия профсоюзы республика оешмасы эшчәнлеге нәтиҗәләре белән таныштырды. «Безнең Татарстан комитеты 41 мең кешене берләштерә. Сан буенча без 85 төбәк оешмасы арасында 3 нче урында торабыз, – дип билгеләп үтте ул. – Соңгы 5 елда кайбер чаралар гамәлгә ашырылды, алар арасында – Татарстан муниципаль хезмәткәрләрен диспансерлаштыру дәрәҗәсен арттыру, тренер һәм инструктор-методистларга ташламаларны һәм гарантияләрне саклап калу, чөнки БЯСМ өстәмә белем бирүдән спорт юнәлешендәге учреждениеләргә күчте».
«Татарстан комитеты диалог һәм хезмәттәшлек өчен һәрвакыт ачык. Безнең конкурсларда, программаларда, проектларда һәм чараларда катнашыгыз. Уртак тырышлык белән без куелган бурычларны хәл итүдә уңышка ирешә алачакбыз», – дип йомгаклады ул.
Аннары җыелышта профсоюз комитетының һәм беренчел профсоюз оешмасының ревизия комиссиясенең яңа әгъзалары, шулай ук хезмәтне саклау буенча вәкаләтле вәкил сайланды.
Чара Министрлыкның һөнәри берлек оешмасының алдынгы әгъзаларын бүләкләү тантанасы белән тәмамланды.