«Нургали оныклары» мәктәп урманчылыгында тәрбияләнүчеләр Саба урман хуҗалыгы тарихы музеенда булдылар

2025 елның 4 апреле, җомга

«Нургали оныклары» мәктәп урманчылыгында тәрбияләнүчеләр Саба урман хуҗалыгы тарихы музеенда булдылар.

Экскурсия барышында укучылар Саба урман хуҗалыгының бай тарихына чумып, урманчыларның Бөек Ватан сугышында Җиңүгә керткән өлешләре турында белделәр. Музей экспозициясендә урман хуҗалыгы белгечләренең, кирәкле ресурсларны – агач, чаңгы, мылтык кашыкларын һ.б. җибәреп, фронтка ничек ярдәм итүләре ачык күренә.

Моннан тыш, балалар  казанышлары һәм эшкә тугрылыгы яңа буыннарны рухландыра торган  РСФСР һәм ТАССР Атказанган урманчысы Нургали Миңнехановның тормыш юлы нечкәлекләрен белделәр.

Экскурсия танып белү генә түгел, тәрбияви яктан да файдалы булды, балаларда табигатькә мәхәббәт һәм тармак белгечләре хезмәтенә хөрмәт хисләрен ныгытты.