Министр Равил Кузюров Теләче муниципаль районына эш сәфәре кылды
Бүген ТР урман хуҗалыгы министры Равил Кузюров Теләче муниципаль районына эш сәфәре кылды. Анда ул район башлыгы Айрат Фәтхуллин катнашында берничә объектны карап чыкты һәм 2025 елның урман культуралары һәм янгын куркынычы сезонына әзерлек мәсьәләләре буенча киңәшмә үткәрде.
Равил Кузюров «Теләче» сәнәгать паркы, «Авангард-строй» ҖЧҖ һәм «Теләче» үсемлекләр питомнигы эшчәнлеге белән танышты. Министр шулай ук Саба урманчылыгының Ленин кишәрлеге урманчылыгында һәм Татарстан Республикасы янгынга каршы хезмәте Саба отрядының Олы Нырсы авылының сак буенча аерым постында булды.
Утырыш Теләче авылында хакимият бинасында узды. Аның эшендә авыл җирлекләре башлыклары, районның авыл хуҗалыгы оешмалары җитәкчеләре катнашты.
Нотыклар белән Кызыл Йолдыз һәм Саба урманчылыкларының җитәкче-урманчылары Нияз Таҗмиев һәм Илһам Рәхмәтуллин чыгыш ясады. Алар урман янгыннарын кисәтү буенча гамәлгә ашырыла торган чаралар һәм «Экологик иминлек» илкүләм проекты кысаларында планлаштырылган эшләр турында мәгълүмат бирделәр.
Утырышка йомгак ясап, министр Равил Кузюров белгечләргә урманнарда патрульлек итү, урманнарда янгын куркынычсызлыгы кагыйдәләре таләпләрен үтәү буенча халык арасында аңлату эшләре алып бару һәм башка йөкләмәләр бирде.
«Урманнарны саклау мәсьәләләрендә барлык структуралар һәм оешмаларның үзара килешеп эшләве мөһим, – диде ул. – Чөнки бары тик уртак тырышлык белән генә без барлыкка килгән куркынычларга нәтиҗәле җавап бирә һәм урман янгыннарын булдырмый кала алабыз».