Бөек Ватан сугышы ветераннары: Баскаков Николай Борисович
«Ветераннар китә, ләкин хәтер исән...» рубрикасы дәвам итә, биредә без Бөек Ватан сугышы геройлары, Татарстан Республикасының урман тармагы ветераннары турында сөйлибез. Бүген чиратта – ветеран Николай Борисович Баскаков тарихы.
Николай Баскаков 1920 елның 2 февралендә Сембер губернасының Буа өязе Ырынгы авылында туа. 1939 елда Лубян урман техникумын тәмамлый.
Кызыл Армия сафларына Николай Баскаков 1939 елның октябрендә чакырыла. Башта элемтә училищесында курсант буларак әзерлек үтә, «радиотелеграфист» белгечлеге ала. Аннары ул 35 нче авиадивизиядә хезмәт итә башлый, һәм шунда Бөек Ватан сугышын каршылый. Сугыш вакытында радиостанция башлыгы, старшина була, Көнбатыш, Карелия, Брянск һәм 2 Белоруссия фронтларында 487 һәм 381 элемтә полклары составында сугыша. 1945 елның декабрендә демобилизацияләнә.
Сугыштан соң Николай Баскаков ТАССР Кайбыч, Буа урман сәнәгате хуҗалыкларында эшли. 1952-1985 елларда Куйбышев урман хуҗалыгының Комаров урманчылыгында урманчы булып эшли. Аның җитәкчелегендә урман торгызу эшләре күләме арттырыла, урман кисү фондыннан файдалану тәртипкә китерелә, урман хуҗалыгын алып баруның нәтиҗәлелеге арттырыла.
Николай Баскаков II дәрәҗә Ватан сугышы ордены, «1941-1945 еллар Бөек Ватан сугышында Германияне җиңгән өчен» медале белән бүләкләнә, «Татарстан АССР Атказанган урманчысы» дигән мактаулы исемгә лаек була.