Рослесхоз: Россиядә урман орлыкларының сыйфатына аерым игътибар биреләчәк
2025 елның 1 сентябреннән Россиядә урман орлыкчылыгы өлкәсендә үзгәрешләр үз көченә керә. Хәзер урман орлыкларын, чәчкеннәрне һәм үсентеләрне җитештерү, саклау һәм куллану мәсьәләләре җайга салыначак.
Элегрәк РФ Урман кодексында урман орлыкчылыгы турында бүлек юк иде. Ләкин орлыклар урман торгызуның нигезе булып тора, ә аларның сыйфаты урманнарны яңадан торгызу күләменә йогынты ясый.
Урман үсемлекләре орлыкларын сертификацияләүнең төгәл тәртибе төп яңалык булачак. Димәк, хәзер урман торгызу өчен бары тик сыйфатлы утырту материалы гына кулланылачак. Сертификацияләнмәгән орлыкларны, шулай ук чәчүлек сыйфатлары расланмаган орлыклардан үстерелгән чәчкеннәрне һәм үсентеләрне куллануны тыю мөһим аспект булачак. Шул ук вакытта урман торгызу һәм урман үрчетү өчен урман питомникларында үстерелгән үсемлекләрдән файдаланырга рөхсәт ителәчәк.
Өстәмә өстенлек – урманнарны яңадан торгызуга дәүләт мониторингын һәм дәүләт урман патологиясе мониторингын уздыру өчен молекуляр-генетик анализ кертү. Бу урман массивларының торышына һәм аларны торгызуга контрольне көчәйтергә мөмкинлек бирәчәк.