Татарстанда «Экологик иминлек» илкүләм проекты кысаларында сабакчалы имән чикләвекләрен җыюга керештеләр
Татарстанның урман тармагы белгечләре сабакчалы имән чикләвеге әзерләүгә керештеләр. Эшләр «Экологик иминлек» илкүләм проектының «Татарстан Республикасында урманнарны саклау» региональ проекты кысаларында үткәрелә.
Быел кимендә 9 тонна чикләвек җыю планлаштырыла. Әзерләнгән барлык орлык материалы «Рослесозащита» ФБУ филиалы – Татарстан Республикасы Урманны саклау үзәгендә тикшереләчәк.
Исегезгә төшерәбез, «Татарстан Республикасында урманнарны саклау» региональ проекты 2025 елдан гамәлгә ашырыла башлады. Проектта өч максатчан индикаторга ирешү билгеләнгән: «урман торгызу һәм урман үрчетү мәйданының киселгән һәм һәлак булган урман утыртмалары мәйданына карата нисбәте, %», «урман торгызу мәйданнарын урман урнашкан җирләргә кертү (үсә барган нәтиҗә белән), мең га» һәм «урман фонды җирләрендә урман янгыннары мәйданын 2021 елга карата киметү, %».