ТР Урман хуҗалыгы министрлыгында законсыз агач әзерләүгә каршы көрәш чараларын гамәлгә ашыру һәм «Чыршы» («Ель») операциясенә әзерлек турында фикер алыштылар
Бүген ТР Урман хуҗалыгы министрлыгында законсыз рәвештә агач әзерләүне, транспортировкалау, эшкәртү, сату һәм экспортлауны кисәтү һәм булдырмау мәсьәләләре буенча ведомствоара комиссия утырышы булды. Чара видеоконференция режимында ТР урман хуҗалыгы министрының беренче урынбасары Илгизәр Зарипов рәислегендә узды.
Төп доклад белән дәүләт контроле һәм күзәтчелеге бүлеге башлыгы Айрат Әхмәров чыгыш ясады, ул 2025 елда урман утыртмаларын законсыз кисүне кисәтү һәм ачыклау буенча эш йомгакларын һәм «Чыршы» оператив-профилактик чарасын үткәрүгә әзерлек планын тәкъдим итте.
«Агымдагы елның 11 аенда урман утыртмаларын законсыз кисүнең 40 очрагы ачыкланды. Узган елның шушы чоры белән чагыштырганда хокук бозулар саны 27% ка кимегән, ә законсыз әзерләнгән агач күләме 68% ка кимегән», – дип билгеләп үтте Айрат Әхмәров.
Ачыкланган хокук бозуларны анализлау нәтиҗәләре буенча агачларны законсыз кисү очраклары еш кына гражданнарның урман законнарын белмәүләре аркасында, аерым алганда, рөхсәт ителгән ауган агачларны җыю урынына корыган агачларны кисәргә тырышканда килеп чыга. Кагыйдә буларак, хокук бозучылар җинаять кылынган урын янында яшәүче җирле халык була.
Законсыз кисүләрне профилактикалау өчен Министрлык һәм аның ведомство буйсынуындагы оешмалар тарафыннан 2025 ел дәвамында 3 меңнән артык профилактик чара уздырылган.
«Агымдагы елның 15-31 декабрендә Татарстан Республикасы территориясендә Яңа ел алдыннан ылыслы токымнарның яшь агачларын саклауны тәэмин итүгә һәм аларны законсыз кисүләрдән саклауны көчәйтүгә юнәлдерелгән «Чыршы» ведомствоара оператив-профилактик чарасы уздырылачак», – дип өстәде Айрат Әхмәров.
Аның кысаларында урман фондына патрульлек итү, шулай ук халык арасында агачларны законсыз кискән өчен җаваплылык, яңа ел чыршыларын һәм наратларын законлы сатып алу ысуллары турында аңлату эшләре оештырылачак.
Утырышта шулай ук Федераль таможня хезмәтенең Идел буе таможня идарәсенең Татарстан таможнясы вәкиле чыгыш ясады, ул 2025 елга ведомствоара комиссиянең урман материаллары белән тышкы икътисадый эшчәнлек алып баручы оешмалар реестрын формалаштыруга һәм агач материаллары контрабандасына каршы көрәш чараларына кагылышлы эш планының 2.5 пункты үтәлеше турында хәбәр итте.
Утырыш азагында Татарстан Республикасында агач материалын законсыз әзерләүне, транспортировкалауны, сатуны һәм экспортлауны кисәтү һәм булдырмау мәсьәләләре буенча ведомствоара комиссиянең 2026 елга эш планы расланды.