Рослесхоз: урман хуҗалыгы учреждениеләре агач әзерли алачак
Дәүләт Думасы дәүләт учреждениеләренең вәкаләтләрен киңәйтә торган закон кабул итте – аларга өлгергән һәм картайган урман утыртмаларын әзерләү хокукы биреләчәк. Шул ук вакытта, агачны сату процессы үтәкүренмәле булсын өчен, аны оештырылган сатуларда сатачаклар. Хәзер мондый учреждениеләр урман хуҗалыгы чаралары кысаларында алынган агач материалларын әзерли һәм шулай ук аларны биржада сата алалар.
«Бу законны кабул итү берьюлы берничә мөһим мәсьәләне хәл итәргә мөмкинлек бирә – өлгергән һәм картайган агачлар булган урман кишәрлекләрен үзләштерү, шулай ук урман хуҗалыгы учреждениеләренең керем дәрәҗәсен арттыру. Беренчедән, автомат рәвештә ихтыяҗ артыграк булган эшлекле агач әзерләнәчәк, икенчедән, бу акчаларны хезмәт хакларын арттыруга, шулай ук яңа техника сатып алуга һәм урманнарны саклау чараларына җибәрергә мөмкинлек бирәчәк. Законда, минем карашка, ике мөһим чикләү төгәл язылган – дәүләт учреждениесе дәүләт урман күзәтчелеген башкарырга тиеш түгел, агач әзерләү подрядчыларны җәлеп итмичә дәүләт учреждениесе тарафыннан башкарылырга тиеш. Бу, беренче чиратта, агач әзерләү һәм сатуның соры схемаларын булдырмау өчен кирәк», – дип йомгаклады Рослесхоз башлыгы Иван Советников.
Төбәкләрдә мондый учреждениеләр тарафыннан агач әзерләү мөмкинлеге булган зоналар билгеләнәчәк. Субъектның урман планына, шулай ук агач әзерләү хокукына ия булачак дәүләт учреждениеләре исемлегенә кертелгән үзгәрешләр Рослесхоз белән килештерелергә тиеш.
Дәүләт учреждениеләре исемлеген формалаштыру һәм үзгәртү тәртибе, шулай ук аларга карата таләпләр һәм аларны тикшерү тәртибе Россия Хөкүмәте тарафыннан билгеләнәчәк.
Агач әзерләү сату-алу шартнамәләре нигезендә башкарылачак, урман кишәрлекләрен дәүләт учреждениеләренә файдалануга тапшыру күздә тотылмый.
Федераль урман хуҗалыгы агентлыгы матбугат хезмәте