Түбән Камада мәктәп урманчылыкларында тәрбияләнүчеләр өчен тематик чара узды
Түбән Кама шәһәрендә «Балалар экология-биология үзәге» МБУ базасында мәктәп урманчылыкларында тәрбияләнүчеләр өчен танып белү чарасы узды. Очрашуда Красный Ключ урта гомуми белем бирү мәктәбе, 20 нче урта гомуми белем бирү мәктәбе, 16 нчы урта гомуми белем бирү мәктәбе һәм 7 нче урта гомуми белем бирү мәктәбе укучылары катнашты.
Белем бирү программасы кысаларында укучылар Яңа ел чыршысын бизәү традицияләре тарихына чумдылар, ылыслы агачларның экологик әһәмиятен һәм аларның планета экосистемасын саклауда төп ролен өйрәнделәр. Катнашучылар шулай ук ылыслы үсемлекләрнең төрле төрләренә багышланган мавыктыргыч тематик викторинада да үз белемнәрен тикшерделәр.
Чараның кульминациясе «Альтернатив яңа ел чыршылары» проектларын тәкъдир итү булды. Яшь урман яклаучылар жюри хөкеменә экологик һәм икенчел материаллардан бәйрәм агачлары ясау мөмкинлеген күрсәтүче авторлык эшләрен тәкъдим иттеләр.
Укучыларның эшләренә ТР «Түбән Кама урманчылыгы» ДКУ белгечләре: урманны саклау һәм яклау буенча инженер Снежана Кодес һәм урман мастеры Олег Гордеев бәя бирде. Экспертлар тәкъдим ителгән проектларның креативлыгы югары дәрәҗәдә булуын билгеләп үттеләр.
Шунысын да билгеләп үтәргә кирәк, мондый чаралар мәктәп укучыларының иҗади потенциалын үстереп кенә калмыйча, үсеп килүче буынның экологик культурасын формалаштыруга да ярдәм итә.