2025 елда Татарстанда урман тармагының 60 белгече пилотсыз очкычлар белән идарә итүне үзләштерде
2025 елда Татарстанның урман тармагының 60 белгече пилотсыз очу аппаратлары белән эшләү буенча укулар узды. Исегезгә төшерәбез, бу өлкәдә кадрлар әзерләү «Пилотсыз авиация системалары» илкүләм проекты буенча гамәлгә ашырыла.
«Пилотсыз авиация системалары өчен кадрлар» федераль проекты кысаларында федераль дәүләт урман контролен (күзәтчелеген) гамәлгә ашыручы 10 вазыйфаи зат «Урманнар мониторингы» программасын үзләштерде. Тагын 45 белгеч «Мультиротор тибындагы пилотсыз һава суднолары операторы» программасы буенча укулар узды. Шулай ук 5 хезмәткәр Санкт-Петербургтагы «Геоскан» ҖЧҖ алар белән эшләү буенча гамәли күнекмәләр алды.
Моннан тыш, узган ел ТР Урман хуҗалыгы министрлыгы урман тармагына пилотсыз авиация системаларын кертү буенча гамәли чаралар уздырды. Мәсәлән, июнь аенда Кызыл Йолдыз урманчылыгы территориясендә өйрәнүләр оештырылды, анда пилотсыз авиация системаларының янгынга каршы тору мөмкинлекләрен күрсәттеләр.
Бүгенге көндә ТР Урман хуҗалыгы министрлыгы карамагындагы пилотсыз авиация системалары авиапаркы 37 берәмлек тәшкил итә. Барлык техника дәүләт теркәвен узды һәм гамәлдәге законнар нигезендә Росавиациядә исәпкә куелган.
Пилотсыз очкычлар урман фонды җирләренең торышын мониторинглау, урман янгыннарын ачыклау һәм контрольдә тоту, законсыз урман кисүләрне кисәтү һәм ачыклау буенча бурычларны нәтиҗәлерәк башкарырга мөмкинлек бирә.
Белгечләрнең квалификациясен күтәрү һәм пилотсыз технологияләрне куллануны киңәйтү буенча эш 2026 елда да дәвам итәчәк.