Петрозаводскида БДБ илләренең урман индустриясе комплексы буенча XIV хөкүмәт-ара утырыш булып узды

2014 елның 3 июлендә Петрозаводскида БДБ илләре вәкилләре урман хуҗалыгы өлкәсендә хезмәттәшлек перспективаларын тикшерделәр.

Утырышта Әрмәнстан, Беларусь, Казахстан, Кыргызстан, Таҗикстан республикаларыннан, Россия Федерациясеннән делегацияләр, шулай ук БДБ Башкарма комитетыннан, БДБ Урман тармагы профсоюзларыннан вәкилләр, чакырылган кунаклар катнашты.

Утырышны Совет рәисе, Урман хуҗалыгы федераль агентлыгы җитәкчесе урынбасары А.В.Панфилов ачып җибәрде.

Утырышта катнашучыларны Карелия Республикасының табигатьтән файдалану һәм экология министры В.Ф.Чикалов тәбрикләде.

Көн тәртибенә ярашлы рәвештә БДБ илләренең урман хуҗалыгы һәм урман индустриясе өлкәсендә 2020 елга кадәр хезмәттәшлегенең төп юнәлешләре тикшерелде.

Беларусь делегациясе БДБ илләренең утырту материаллары үстереп сату, урман хисабы эшләрен үткәрү буенча үзара хезмәттәшлеген көчәйтү буенча берничә анык тәкъдим кертте. Россия делегациясе урман хуҗалыгы өлкәсендә икеяклы хезмәттәшлекне координацияләү өчен уртак эш төркемнәре төзергә киңәш итте.

БДБ урман тармагы эшчәннәре профсоюзлары федерациясе игътибарны “кеше капиталын” үстерүгә, социаль стандартлар, заманча кадрлар әзерләү һәм осталык арттыру системаларын булдыруга, кеше потенциалын инвестицияләүгә һәм лаеклы эш шартлары булдыруга юнәлтте.

Казахстан делегациясе БДБ урман фондына юлдаш мониторингы белешмәләрен урманнарны саклау максатларында уртактан файдаланырга тәкъдим итте.

Тикшерүләр нәтиҗәсендә Совет уртак карарлар кабул итте, киләсе елга эш планын билгеләде.