Тәтешнең 2нче мәктәбендә Кошлар көненә багышланган дәрес үткәрелде

Дәрес вакытында безнең якта кышлаучы һәм язын көньяктан кайтучы кошлар, ТР Кызыл китабына кертелгән сирәк кошлар турында күп кызыклы нәрсәләр аңлатылды. Укучылар ата-аналары һәм класс җитәкчесе И.Ю.Михеев белән бергә сыерчык оялары ясап, тыюлыкка бүләк иттеләр. “Озын Алан” тыюлыгы башлыгы В.П.Никитин класска кошлар турындагы плакатлар, китаплар бүләк итте, актив табигать саклау эшчәнлекләре өчен диплом тапшырды. Ясалган барлык кош оялары табигать тыюлыгы территориясендә эленәчәк.