«Яшел патруль» мәктәп урманчылыгында тәрбияләнүче балалар Ютазы урта мәктәбе укучылары өчен экологик дәресләр үткәргән
«Яшел патруль» мәктәп урманчылыгында тәрбияләнүче балалар Ютазы урта мәктәбе укучылары өчен «Чүп-чарны аерым җыю һәм икенчел эшкәртү» һәм «Ничек итеп экологик сәяхәт кылырга» дигән темаларга экологик дәресләр үткәргән. Дәрес барышында яшь урманчылар укучыларга әйләнә-тирә мохитне саклау, калдыкларны аерым җыю принциплары, экологик туризм һәм махсус сакланыла торган табигать территорияләре турында сөйләгән.
«Барлык дәресләр дә «Нәни экологлар – яшь табигать сакчылары» россиякүләм дәресе» акциясе кысаларында үткәрелде. Акциядә катнашу өчен белем бирү оешмасында дәрес үткәрергә һәм социаль челтәрләрдә фоторәсемнәр куярга кирәк иде, – дип сөйләде мәктәп урманчылыгында катнашучы Айсылу Җамалетдинова. – Дәресләрнең максаты – укучыларны экологик агарту һәм җаваплы экологик тәртип формалаштыру».