Кызыл Йолдыз урман хуҗалыгы хезмәткәрләре имән чикләвеге җыюга керешкән

2021 елның 23 сентябре, пәнҗешәмбе

ТР «Кызыл Йолдыз урман хуҗалыгы» ДБУ хезмәткәрләре имән чикләвеге җыюга керешкән. «Әлеге эшләр Кызыл Йолдыз урманчылыгының Теләче кишәрлегендәге 17 нче кварталында урнашкан даими орлык алу кишәрлекләрендә башкарыла. Быел уңыш яхшы, – дип сөйләде ТР «Кызыл Йолдыз урманчылыгы» ДКУ урманнарны торгызу инженеры Иван Большаков. – План нигезендә, барлыгы 550 килограмм имән чикләвеге җыярга кирәк. Эшне 1 ноябрьгә кадәр төгәлләргә уйлыйбыз».

«Быел элегрәк без ылыслы агачлардан 35 килограмм орлык әзерләгән идек, шуларның 15 кг – чыршы, 10 кг – нарат, 10 кг – карагай орлыгы. Татарстан Республикасының Урманнарны яклау үзәгендә узган тикшерү нәтиҗәләре буенча аларның сыйфаты беренче класслы дип табылды», – диде Иван Большаков.