Татарстанда 2,8 мең гектар мәйданда урманнарда санитар-савыктыру чаралары үткәрелгән

2021 елның 10 ноябре, чәршәмбе

Татарстан Республикасында урман утыртмаларының санитар торышын яхшырту эшләре дәвам итә. ТР Урман хуҗалыгы министрлыгы белгечләре мәгълүматлары буенча, быелның 10 ноябренә 2,8 мең гектар мәйданда санитар-савыктыру чаралары үткәрелгән, шул исәптән 2,5 мең гектарда ликвидлы булмаган агачлар җыеп алынган. Республиканың Саба өйрәнү-сынау, Кәләй һәм Ары урман хуҗалыклары хезмәткәрләре югары темпта эшли.

Исегезгә төшерик, санитар-савыктыру чаралары урманнарны саклау чаралары комплексының бер өлеше булып тора. Санитар-савыктыру чаралары утыртмаларның биологик тотрыклылыгын саклау, урманнарда патологик процессларның киң үсеш алуын кисәтү, корткычлардан һәм авырулардан килгән зыянны киметү максатларында уздырыла.