Чирмешән лицееның 4 нче сыйныф укучылары Чирмешән урманчылыгының эш юнәлешләре турында белгәннәр
Чирмешән лицееның «Лесовичок» мәктәп урманчылыгында тәрбияләнүче балалар һәм Чирмешән лицееның 4 нче сыйныф укучылары «Чирмешән урманчылыгы» ТР ДКУ кунакта булып киткәннәр. Балалар өчен экскурсияне Казан кишәрлеге урманчысы Марс Рәхимҗанов үткәргән.
Укучылар урманчылыкның административ бинасын, урман музеен караган һәм «Чирмешән урманчылыгы бүләкләре» кибете продукциясе ассортименты белән танышкан (халык кулланыла торган товарлар, бал, җиләк, чикләвек һ.б.).
Шулай ук «Урман – безнең байлыгыбыз» темасына түгәрәк өстәл дә оештырылган. Аның кысаларында Марс Рәхимҗанов балаларга урманнар, аларның мөһим экологик, икътисадый һәм социаль функцияләре, урман тармагы һөнәрләре турында сөйләгән. «Лесовичок» мәктәп урманчылыгында катнашучылар берләшмәнең эшчәнлек юнәлешләре һәм табигать саклау акцияләре турында кыскача доклад белән чыгыш ясаганнар.