Казанда Аккош күле урман паркында балалар һәм өлкәннәр өчен яңа экосукмак ачылды
Казанда яңа экосукмак барлыкка килде һәм өлкәннәр, балалар өчен ирекле рәвештә кулланыла башлады. Ул Аккош күле урман паркының төньяк өлешендә, Тирәк күл янында урнашкан. Маршрутны төзүдә Татарстан шәһәрләрен үстерү институтының Табигый территорияләр дирекциясе, «Казан органик синтез» һәм ТР Фәннәр академиясе катнашты.
Экосукмак кызыклы, чөнки анда озын гомерле агачлар һәм бары тик уңай табигый шартларда гына яши ала торган биоиндикатор үсемлекләр очрый. Җәяүлеләр маршруты өчен нигез булып Татарстан Фәннәр академиясе галимнәренең тикшеренүләре тора, алар «Аккош күле» урман паркының урман массивында фауна һәм флора вәкилләренең 800 төрен табып, шуларның 70тән артыгы республика Кызыл китабына кертелгән.
Җәяүлеләр өчен гомуми озынлыгы 11 км булган өч экологик-агарту маршруты концепциясе эшләнгән. Маршрутларның берсе – Төлке маршруты – балалар өчен мәгърифәтчелек туризмына юнәлдерелгән. Аның максаты – урман тормышын күзәтү, аның шәһәр мохите белән кеше арасындагы бәйләнешен тикшерү.
2,5 км озынлыктагы юлда интерактив экспонатлар һәм мәгълүмати стендлар белән 7 тематик тукталыш очрашачак. Сәяхәтчеләр урман хайваннары эзләрен таба һәм «сынап карый» алачак, кошларны тавышлары буенча танырга һәм бөҗәкләр өчен чын кунакханәгә керергә өйрәнә алачак.
Шәһәр халкы һәм кунаклары экосукмакның старт ноктасына керә ала, аңа урман юлы буенча Тирән күл ягыннан барып була. Киләчәктә теләге булган һәркем маршрут буенча Васильченко урамы ягыннан хәрәкәт итә алсын өчен, монда тукталыш павильоны һәм җәяүлеләр кичүен ясау планлаштырыла.
Экосукмак Татарстанда Иделнең уң ярыннан уза торган Идел сукмагы зур туристлык маршрутының һәм «СИБУР экосукмаклары» проектының бер өлеше булып тора.