ТР Урман хуҗалыгы министрлыгында киләсе чорга бурычлар билгеләнде
Бүген министрлыкта видеоконференция режимында киңәшмә узды, анда алдагы чорга бурычлар билгеләнде. Киңәшмәне ТР урман хуҗалыгы министрының беренче урынбасары Илгизәр Зарипов үткәрде. Утырыш эшендә Министрлыкның структур бүлекчәләре җитәкчеләре, урманчылыкларның җитәкче-урманчылары һәм республика урман хуҗалыклары директорлары катнашты.
Киңәшмәдә министрның беренче урынбасары Илгизәр Зарипов чыгыш ясады.
Ул сөйләгәнчә, бу елның 6 августына Татарстан Республикасында 509 кг орлык әзерләнгән, шул исәптән нарат – 407 кг, чыршы – 72 кг, карагай – 10 кг, каен – 10 кг, юкә – 10 кг. «Август-сентябрь айларында корычагач, каен, өрәңге һәм имән чикләвеге орлыкларын җыюны көчәйтергә кирәк, – диде Илгизәр Зарипов. – Шулай ук урман культураларын агротехник карау чараларын да активлаштырырга кирәк. 1 сентябрьгә план 90% дәрәҗәсендә үтәлергә тиеш».
Министрның беренче урынбасары быел республикада парсыз ефәк күбәләгенең яңа урыннары теркәлүен өстәде. «Урман утыртмаларын тикшерүне дәвам итәргә һәм хисапларны Министрлыкка вакытында тапшырырга кирәк», – дип билгеләде ул.
Шулай ук Илгизәр Зарипов искәрткәнчә, агымдагы елда 2,6 мең га мәйданда яшь үсентеләрне тәрбия максатларында кисү планлаштырылган. «Эш күләме буенча алдынгылар рәтендә – Саба, Болгар, Кайбыч һәм Кызыл Йолдыз урман хуҗалыклары белгечләре, – дип ассызыклады ул. – Башкаларга тиешле чараларны күрергә һәм 1 октябрьгә кадәр төгәлләргә кушам».
Соңыннан министрның беренче урынбасары «Лубян урман-техник көллияте» ДБҺБУ кабул итү кампаниясенә тукталды.