2025 елда Татарстанда 1 мең га мәйданда санитар-савыктыру чаралары үткәреләчәк

2025 елның 14 гыйнвары, сишәмбе

2025 елда Татарстан Республикасында 1 мең гектар мәйданда санитар-савыктыру чаралары үткәреләчәк. Исегезгә төшерәбез, бу төр эшнең максаты – утыртмаларның биологик тотрыклылыгын саклау, урманда патологик процессларның киң үсешен кисәтү, корткычлардан һәм авырулардан зыянны киметү. Санитар-савыктыру чараларын уздыру «Экологик иминлек» илкүләм проектын гамәлгә ашыруга ярдәм итә.

Санитар-савыктыру чаралары ел дәвамында ТР Урман хуҗалыгы министрлыгы карамагындагы учреждениеләр һәм урман хуҗалыклары белгечләре көче белән башкарылачак. Рекреация басымы зур булган урман фонды кишәрлекләренә – автомобиль юллары, торак пунктлар, шулай ук социаль объектлар янындагы урыннарга махсус игътибар биреләчәк.