2025 ел башыннан Татарстанда урманнарда 16,1 мең патрульлек башкарылган
Татарстан Урман хуҗалыгы министрлыгында 2025 елның 1 нче яртыеллыгында федераль дәүләт урман контролен (күзәтчелеген) һәм урман сагын гамәлгә ашыруга йомгак ясалды. Шушы чорда дәүләт урман инспекторлары тарафыннан урман фонды җирләренә 16,1 мең патрульлек, 2,2 мең контроль-күзәтчелек һәм профилактика чаралары үткәрелгән.
Административ хокук бозулар турында барлыгы 65 беркетмә төзелгән. Төп хокук бозулар арасында – урманнарда санитария куркынычсызлыгы кагыйдәләрен, урманнардан файдалану кагыйдәләрен бозу һәм административ штрафны законда билгеләнгән вакытта түләмәү.
Моннан тыш, дәүләт урман инспекторлары урманнан файдаланучыларның гражданлык-хокукый мөнәсәбәтләр кысаларында урман законнарында каралган мәҗбүри таләпләрнең үтәлешен тикшереп тору һәм кисәтү эшләрен дә алып бардылар.
Әлеге чараларны гамәлгә ашыру «Экологик иминлек» илкүләм проекты максатларына һәм бурычларына туры килә.