Кукмара муниципаль районында ТР мәктәп урманчылыкларының «Урманны бергә саклыйк» VIII слеты ачылды
Бүген Кукмара муниципаль районының Лубян авылында «Лубян урман-техник көллияте» ДБҺБУ базасында ТР мәктәп урманчылыкларының «Урманны бергә саклыйк» VIII слеты ачылды.
Исегезгә төшерәбез, быел иң яхшылар исеме өчен Татарстан районнарыннан 31 команда көрәшә, шулай ук слетта Томск өлкәсеннән, Мари Эл Республикасыннан һәм Чуашиядән мәктәп урманчылыкларында тәрбияләнүчеләр дә катнаша. Слетка барлыгы 200 кеше җыелыр дип көтелә.
Программа кысаларында бүген экскурсия үткәрелде, анда катнашучылар Лубян урман-техник көллиятенең уку аудиторияләрен, китапханә, музей һәм башка биналарын карадылар, студентлар өйрәнә торган белгечлекләр һәм дисциплиналар турында белделәр. Бу балаларга көллияттә укуның нинди перспективалар ачуы һәм урман хуҗалыгы һәм экология өлкәсендәге һөнәри эшчәнлек өчен нинди компетенцияләр кирәклеге турында яхшырак аңларга мөмкинлек бирде.
Моннан тыш, каз адымы белән йөрү, тәгәрмәч шудыру, авыр туплар белән йөгерү, шина салу һәм «яралы»ны күчерү кебек этапларны үз эченә алган спорт эстафетасы оештырылды. Бу сынаулар укучыларның физик чыдамлыгын һәм җитезлеген, шулай ук командада эшли белүләрен бик яхшы сынау булды.