ТР урман хуҗалыгы министры инша конкурсында җиңүчеләрне котлады
Бүген Татарстан Республикасы урман хуҗалыгы министры Равил Кузюров КДАУ урман хуҗалыгы һәм экология факультетында булды, биредә ул вузның булачак абитуриентлары – Татарстанның мәктәп урманчылыкларында укучылар белән очрашты. Чарада шулай ук КДАУ ректоры Җәүдәт Фәйзрахманов, урман хуҗалыгы һәм экология факультеты деканы Людмила Пухачева һәм профессор Харис Мусин катнашты.
Сәламләү сүзләрен җиткергәндә Равил Кузюров урманнарны саклауның һәм үрчетүнең әһәмиятле булуы турында ассызыклады, экологик планда гына түгел, ә урман өлкәсенең төбәк һәм ил икътисадына булган мөһим йогынтысын да билгеләде.
"Хәзерге вакытта республиканың Урман хуҗалыгы министрлыгында тормышларын урман өлкәсе белән бәйләргә карар кылган яшь белгечләргә булышлык күрсәтү программасы эшләнә. Без дәүләттән ярдәм булсын өчен нык тырышачакбыз, яшь белгечләр безгә эшләргә килергә тиеш", – дип билгеләде Равил Кузюров.
Очрашу азагында Татарстан Республикасы урман хуҗалыгы министры Равил Кузюров, КДАУ ректоры Җәүдәт Фәйзрахманов белән берлектә, инша конкурсында җиңүчеләрне котлады. Ул Татарстанның мәктәп урманчылыкларындагы 10 сыйныф укучылары арасында уздырылды. Балалар "Минем туган төбәгем – урман бишеге" һәм "Минем кече ватаным урманнары" темасына үз фикерләрен иншалаган иде. Конкурсның төп максаты – урман һөнәрләрен популярлаштыру.
Конкурс комиссиясе 17 укучының эшен карады. Конкурс ике номинациядә – рус һәм татар телләрендә узды. Саба урманчылыгыннан һәм Лаеш урман хуҗалыгыннан укучылар җиңүче булды. Иң яхшы укучылар Татарстан Республикасы Урман хуҗалыгы министрлыгыннан бүләкләр алды.
ТР УХМ матбугат хезмәте