Татарстан Республикасы Лаеш муниципаль районында совет чорында һәм Россиянең күренекле хәрби җитәкчесе Мәхмүт Гәрәев хөрмәтенә истәлекле агач утыртылган
Татарстан Республикасы Лаеш муниципаль районында совет чорында һәм Россиянең күренекле хәрби җитәкчесе Мәхмүт Гәрәев хөрмәтенә истәлекле агач утыртылган. Акция М.Ә.Гәрәев исемендәге Габишев урта мәктәбе территориясендә узган. Эшләрдә Россия Эчке эшләр министрлыгы КЮИ Дәүләт-хокук дисциплиналары кафедрасы профессоры, юридик фәннәр докторы Максим Андреев һәм мәктәп укучылары катнашкан.
Акциядә катнашучылар көче белән барлыгы 50 данә ылыслы токым үсентесе утыртылган.
Белешмә өчен. Гәрәев Мәхмүт Әхмәт улы (23.07.1923-25.12.2019) – совет чорында һәм Россиянең хәрби җитәкчесе, Бөек Ватан сугышы ветераны, РФ Хәрби фәннәр академиясенә нигез салучы, хәрби һәм тарих фәннәре докторы.
Мәхмүт Гәрәев Чиләбедә, татар гаиләсендә туган. 1939 елда ул Кызыл Армиягә языла, аннан Ташкент пехота хәрби училищесында укый. Урта Азиянең хәрби частьларында офицер була, ә 1942 елдан Бөек Ватан сугышы фронтларында көрәшә. 1945 елда Ерак Көнчыгышта Япониягә каршы сугышларда катнаша. Сугышны 22 яшендә майор исемендә тәмамлый.
Сугыштан соң бөтен ил буенча төрле частьларда һәм бүлекчәләрдә хезмәт итә. 1950 елда Фрунзе исемендәге хәрби академияне тәмамлый, 1959 елда Генштаб хәрби академиясен бетереп чыга. Дивизияләргә җитәкчелек итә, армия командиры урынбасары, Урал хәрби округы штабы башлыгы, ә 1984 елдан Генераль штаб җитәкчесе урынбасары була.
Мәхмүт Гәрәев чит илләрдә совет хәрби миссияләре белән җитәкчелек итә: 70 нче елларда – Мисырда, 80 нче елларда – Әфганстанда.
1992 елда отставкага киткәч, Мәхмүт Гәрәев фәнни, мәгърифәтчелек һәм иҗтимагый эшчәнлек белән актив шөгыльләнә. 1995 елда ул РФ Хәрби фәннәр академиясенә нигез сала, вафатына кадәр аның президенты була.