Татарстанда 3,3 мең гектардан артык мәйданда урманнарда санитар-савыктыру чаралары үткәрелгән

2021 елның 7 декабре, сишәмбе

Татарстан Республикасында урман утыртмаларының санитар торышын яхшырту эшләре дәвам итә. ТР Урман хуҗалыгы министрлыгы белгечләре белешмәләренә караганда, быелның 7 декабренә санитар-савыктыру чаралары 3,3 мең га мәйданда үткәрелгән, шул исәптән 2,7 мең гектардан ликвидсыз агачлар җыеп алынган. Республиканың Саба, Кәләй, Исләйтар һәм Чирмешән өйрәнү-сынау урман хуҗалыклары хезмәткәрләре югары темплар белән эшли.

Исегезгә төшерик, санитар-савыктыру чаралары урманнарны саклау чаралары комплексының бер өлеше булып тора. Алар үсентеләрнең биологик тотрыклылыгын саклау, урманда патологик процессларның киң үсешен кисәтү, корткычлардан һәм авырулардан зыяннарны киметү максатларында үткәрелә.