Азнакай урманчылыгы территориясендә урман утыртмаларының санитар торышын яхшырту эшләре төгәлләнде

2021 елның 9 декабре, пәнҗешәмбе

Азнакай урманчылыгының урман фонды территориясендә урман утыртмаларының санитар торышын яхшырту буенча эшләр төгәлләнде. ТР «Азнакай урман хуҗалыгы» ДБУ директоры Эдуард Чикуров сүзләренә караганда, барлыгы 96 га мәйданда санитар-савыктыру чаралары башкарылган, шул исәптән, 60 га мәйданнан ликвид булмаган агачлар җыелган.

«Киләсе елда мондый эшләр 100 га мәйданда башкарылачак. Аларга апрель аенда керешергә планлаштырабыз», - дип өстәде ул.

Исегезгә төшерәбез, санитар-савыктыру чаралары урманнарны саклау чаралары комплексының бер өлеше булып тора. Алар утыртмаларның биологик тотрыклылыгын саклау, урманда патологик процессларны киң җәелдерүне кисәтү, корткычлар һәм авырулар салган зыянны киметү максатларында үткәрелә.