Бөек Ватан сугышы ветераннары: Миңнеханов Сәмигулла Миңнехан улы
Бөек бәйрәм - Җиңү көне алдыннан без Бөек Ватан сугышы ветераны, урман хуҗалыгы хезмәткәре Миңнеханов Сәмигулла Миңнехан улының тарихы белән уртаклашабыз.
Сәмигулла Миңнехан улы Миңнеханов 1923 елның 1 июнендә Кызыл Йолдыз районының Берсут-Сукачы авылында (хәзерге Мамадыш) туган. Күп балалы гаиләдә үскән: 12 бала булган, бишесе генә исән калган. Белеме – 4 сыйныф. Сәмигулла 10 яшеннән колхозда эшли башлый.
Фронтка 1942 елның 16 мартында китә. 14 апрельгә кадәр Суслонгерда, Казан янында запас полкта булган, ә бу көнне аларның бер өлешен эшелоннарга төяп Смоленск өлкәсенә озатканнар. Тернопольдән дүрт көн җәяү Смоленскига кадәр барырга туры килгән.
Ветеран үз хезмәтен Ломоносов исемендәге 234 нче дивизиядә, 1340 нчы укчылар полкында генерал-лейтенант Константин Рокоссовский җитәкчелегендәге частьләрдә башлый. Авыр Смоленск сугышларыннан соң аларның бер өлешен фаш итәләр һәм Көнбатыш Украинага җибәрәләр, алар Ковель шәһәрен азат итәләр. Сәмигулла Миңнеханов Висла елгасын кичүдә, Польшаны азат итүдә катнаша.
1945 елның 16 мартында алар Германиягә хәрби җитәкче Георгий Жуков җитәкчелегендә барып җитәләр. Штеттенны алганда Сәмигулла Миңнеханов иңенә яралана. Берлинга кадәр нибары 60 километр гына җитми кала.
Җиңү көнен ул Польша Котна шәһәре госпиталендә каршы ала. Аннары Белоруссиягә, Гродно шәһәренә, 30 нчы аерым армия танк полкына озатыла. 1947 елның мартына кадәр шунда хезмәт итә.
1943 һәм 1944 елларда «Батырлык өчен» медальләре белән бүләкләнә. Өлкән сержант исемендә 1947 елның апрелендә демобилизацияләнә.
1949 елда өйләнә. Тормыш иптәше – Мәгъсүмә Исхак кызы Исхакова. 1954 елда Кама урман хуҗалыгына кайталар. Анда Сәмигулла Миңнеханов 1978 елның 1 июненә кадәр моторчы-аударучы булып эшләгән. Ул җиде ел дәвамында Социалистик хезмәт ударнигы, 1974 елда Мактау китабына кертелгән.
Аның фотосурәте 1975-1977 елларда Мактау тактасын бизи. Хатыны белән алар дүрт кыз тәрбияләп үстергәннәр. Хәзер ул кызы белән яши: җәен туган авылында, ә кышын Чаллыга күчеп киләләр.
«ТАТМЕДИА» АҖ филиалы «Мамадыш-информ» материаллары файдаланылды