Татарстанның урман хуҗалыгы министры аппарат киңәшмәсе уздырды
Бүген Татарстан Республикасы Урман хуҗалыгы министрлыгында аппарат киңәшмәсе узды, аның барышында беркетмә йөкләмәләренең үтәлеше каралды. Киңәшмәне ТР урман хуҗалыгы министры Равил Кузюров уздырды. Чарада министр урынбасарлары, Министрлык бүлекләреннән җитәкчеләр һәм белгечләр катнашты.
Киңәшмәдә катнашучылар министрга урманнарны саклау, яклау һәм торгызу, исәпләнгән диләнкене үзләштерү, мәктәп урманчылыкларын үстерү, дәүләт телләре турында Татарстан Республикасы законнарын үтәү һ.б. буенча башкарыла торган эшләр турында җиткерде.
Асылда, ТР урман хуҗалыгы министры Равил Кузюров Министрлыкның ведомство буйсынуындагы учреждениеләрдә "Аверс: урман фондына идарә итү" урман комплексын исәпкә алу мәгълүмат системасын кертү барышы белән кызыксынды. Министрга хәзерге вакытта җаваплы белгечләрне әлеге системада эшләү аспектларына өйрәтү уздырылуы турында сөйләделәр.
Министр шулай ук урманнарда янгын чыгу куркынычы янаган чорга әзерләнү мәсьәләләренә дә махсус игътибар бирде. "Барлык җитәкче-урманчылар район киңәшмәләрендә һәм җыелышларда докладлар белән чыгыш ясарга тиеш, – диде ул. – Янгын чыгу куркынычы янаган чор башланганчыга кадәр үк урман янгыннарына каршы пропаганда алып бару зарур".
Болар белән беррәттән, Равил Кузюров урман законнары бозылуны кисәтүгә һәм ачыклауга һәм урман фонды территориясендә урнашкан балаларны савыктыру лагерьлары эшен оештыруга кагылышлы берничә йөкләмә бирде.