2 февраль – Сулык-сазлыклар көне
Әлеге көн 1971 елда Иранда Каспий диңгезе буендагы Рамсар шәһәрендә Сулык-сазлыклар буенча Конвенциягә кул куелганнан бирле билгеләп үтелә.
Рамсар конвенциясенә кушылган дәүләтләр үз территорияләрендә халыкара әһәмияткә ия булган Сулык-сазлыклар исемлегенә кертелә торган участокларны билгелиләр һәм сулык-сазлык территорияләрен һәм аларда яшәүче су кошларын саклауны һәм аларны тикшереп торуны тәэмин итүне үз өсләренә ала.
«Спас» комплекслы профилле төбәкара әһәмияткә ия булган дәүләт табигый заказнигы территориясе тармакланган сулык-сазлыктан торган 60 утрау тәшкил итүче архипелагтан гыйбарәт. Әлки районындагы Нәби Дәүли исемендәге Базарлы-Матак гимназиясендә заказник белгечләре оештырган чара шул архипелаг темасына багышланган иде.
Шулай ук шактый мәйданда сулык-сазлыклардан торган «Чиста болыннар» дәүләт табигый заказнигында бу көнне браконьерлыкны кисәтү чаралары узды.