Уфада Идел буе федераль округында урманнарны саклау, яклау һәм яңадан торгызу буенча башкарылган эшләрнең нәтиҗәләре турында фикер алыштылар
Бүген Башкортостан Республикасының Уфа шәһәрендә «Идел буе федераль округының Россия Федерациясе субъектлары тарафыннан урман мөнәсәбәтләре өлкәсендә тапшырылган вәкаләтләрне үтәү нәтиҗәлелеге: 2022 ел йомгаклары һәм 2023 елга бурычлар» темасына киңәшмә узды. Утырыш эшендә Федераль урман хуҗалыгы агентлыгы җитәкчесе Иван Советников, Идел буе федераль округы буенча Урман хуҗалыгы департаменты башлыгы Александр Орнатский, Россия Федерациясе Президентының Идел буе федераль округындагы Тулы вәкаләтле вәкиле ярдәмчесе помощатерина Екатерина, Идел буе федераль округында урман хуҗалыгы белән идарә итүнең төбәк органнары җитәкчеләре, шул исәптән Татарстан Республикасыннан – ТР урман хуҗалыгы министры Равил Кузюров, тармак учреждениеләре, фәнни һәм эксперт җәмәгатьчелеге вәкилләре катнашты.
Киңәшмәдә докладлар белән Федераль урман хуҗалыгы агентлыгы җитәкчесе урынбасары Вячеслав Спиренков, Идел буе федераль округы буенча Урман хуҗалыгы департаменты башлыгы Александр Орнатский, Россия Гадәттән тыш хәлләр министрлыгының Түбән Новгород өлкәсе буенча Баш идарәсе җитәкчесе, эчке хезмәт генерал-лейтенанты Валерий Синьков, «Идел буе дәүләт технология университеты» ЮББ ФДБМУ ректоры Игорь Петухов һәм башкалар чыгыш ясады.
Утырышта катнашучылар Идел буе федераль округы төбәкләрендә урманнарны саклау, яклау һәм яңадан торгызу буенча 2022 елда башкарылган эш нәтиҗәләрен, урманнарда янгын куркынычсызлыгын тәэмин итү проблемаларын, урман тармагы өчен кадрлар әзерләү мәсьәләләрен карадылар.
Урман законнарына үзгәрешләр 2023 елның 1 мартыннан үз көченә керде.
Пленар утырыштан тыш, бүген шулай ук 2023 елда урманнарда янгын куркынычы сезонына әзерлек, урман корылышы, урманнарны торгызу эшләре, 29.07.2017 № 280-ФЗ Федераль законны гамәлгә ашыру мәсьәләләре буенча дүрт түгәрәк өстәл оештырылды.
Иртәгә, 3 мартта, производство участокларын карау һәм Башкортстан Республикасы урман сәнәгате комплексы вәкилләре белән «Бизнес белән ачык диалог» планлаштырылган.