ТР урман хуҗалыгы министры урынбасары Рәис Гомәров Лаеш һәм Зеленодольск муниципаль районнарына эшлекле сәфәр кылды
Бүген ТР урман хуҗалыгы министры урынбасары Рәис Гомәров Лаеш һәм Зеленодольск муниципаль районнарына эшлекле сәфәр кылды. Максат – ведомство карамагындагы учреждениеләрнең 2022 елдагы эш йомгаклары һәм 2023 елга бурычлары буенча киңәшмәләр үткәрү.
Утырыш «Лаеш урманчылыгы» ДКУ һәм «Лаеш урман хуҗалыгы» ДБУ хезмәткәрләре катнашында Лаеш шәһәре администрациясе бинасында узды. Аның эшендә муниципаль район башкарма комитеты җитәкчесе вазыйфаларын башкаручы Андрей Карсалов, ведомство карамагындагы учреждениеләр җитәкчеләре һәм белгечләре катнашты.
Төп доклад белән җитәкче-урманчы урынбасары Фәнил Фазлыев чыгыш ясады. Ул узган елда башкарылган урман культуралары, урманнарны саклау һәм урман хуҗалыгы эшләре һәм урманнарда янгын чыгу куркынычы янаган чорга әзерлек барышы турында сөйләде.
«Лаеш урманчылыгы территориясендә урман янгыннарын сүндерү буенча план һәм урманнарны янгыннан саклау эшен оештыру буенча чаралар планы эшләнде. Янгын чыгу куркынычы янаган чор башланганчы белгечләр «Урман янгыннарын сүндерү тактикасы һәм техникасы. Урман янгыннарын сүндергәндә хезмәтне саклау һәм куркынычсызлык техникасы» программасы буенча өйрәнүләр уздылар», – дип билгеләп үтте Фәнил Фазлыев. – Урман культурасы кампаниясенә әзерлек тә тулы көченә бара».
Шулай ук башкарылган эшләр турында урман хуҗалыгы директоры вазыйфаларын башкаручы Марат Кыямов һәм урман остасы, башлангыч һөнәри берлек оешмасы рәисе Рәсил Газизуллин да хәбәр иттеләр.
Киңәшмәгә йомгак ясап, министр урынбасары Рәис Гомәров белгечләргә урман үсемлекләре орлыкларын әзерләү, санитар-савыктыру чараларын үткәрү һ.б. бәйле берничә йөкләмә бирде.
«2022 елда Урман янгыннарын сүндерү үзәгенең төбәк диспетчерлык хезмәте аша Лаеш районы территориясендә 15 янгын очрагы теркәлгән. Алар еш кына Сокуры, Никольское, Нармонка һәм Тетеево кебек торак пунктлар янында теркәлгән. Бу, нигездә, коры үлән, камыш һәм чүп янгыннары, – диде ул. – Янгын куркынычсызлыгы сезонында урманнарда янгын куркынычсызлыгы кагыйдәләре үтәлешен контрольдә тотуны көчәйтүегез, халык арасында актив аңлату эше алып баруыгыз турында сорыйм».
«Зеленодольск урманчылыгы» ДКУ һәм «Зеленодольск сынау урман хуҗалыгы» ДБУ эш нәтиҗәләре Зеленодольск шәһәрендә «Горький исемендәге Мәдәният, сәнгать һәм халык иҗаты үзәге» МБУ базасында каралды. Утырышта муниципаль район башлыгы Михаил Афанасьев катнашты.
Докладлар белән җитәкче-урманчы Наил Абдуллин һәм кадрлар буенча белгеч, башлангыч һөнәри берлек оешмасы рәисе Нәфисә Шәрипова чыгыш ясады.
Наил Абдуллин «Экология» илкүләм проектының «Татарстан Республикасында урманнарны саклау» төбәк проекты кысаларында башкарылган эшләр, башкарылган санитар-савыктыру, контроль-күзәтчелек чаралары, урманнарда янгын куркынычсызлыгын тәэмин итү буенча гамәлгә ашырылган чаралар һ.б. турында сөйләде.
«Хәзерге вакытта 2023 елның янгын чыгу куркынычы янаган һәм урман культурасы сезонына әзерлек эшләре тулы көченә бара, – дип хәбәр итте ул. – Урман культурасы кампаниясе кысаларында Зеленодольск урманчылыгы территориясендә 14,5 гектар мәйданда урманнарны торгызу эшләре башкарылачак. Моның өчен питомникларда 340 меңнән артык стандарт утырту материалы үстерелде. Чәчүлекләр урманнарны торгызу өчен дә, саклагыч урман утырту өчен дә, табигатьне саклау акцияләрен оештыру өчен дә җитәрлек».
Нәфисә Шәрипова беренчел һөнәри берлек оешмасының узган елдагы эшчәнлеге турында хәбәр итте.
Киңәшмәгә район башлыгы Михаил Афанасьев һәм министр урынбасары Рәис Гомәров йомгак ясадылар.
Михаил Афанасьев Зеленодольск районында агач эшкәртүгә басым ясап, сәнәгать паркы булдыру теләге турында белдерде. «Бездә агач он, шпон, погонаж, агач каркаслы әйберләр җитештерү белән шөгыльләнергә теләүчеләр бар. Без мондый эшкуарларны җыя һәм берләштерә алабыз, кече һәм урта бизнесны җәлеп итә алабыз», – диде ул.
Рәис Гомәров әлеге инициативаны хуплады һәм ведомство карамагындагы учреждениеләр белгечләренә узган елда җайга салынган, нәтиҗәле эшләре өчен рәхмәт белдерде. «1 нче мартта урман корылышы, урманнарны кисү өчен аерып чыгару, агачны маркалау һәм урман янгыннарын сүндерүгә кагылышлы урман законнарындагы үзгәрешләр үз көченә керде, – дип ассызыклады ул. – Яңалыкларны җентекләп өйрәнергә һәм хезмәткәрләр өчен укыту семинарлары үткәрергә кирәк».