ЯҢАЛЫКЛАР

Салкыннар килү белән утыртмалар өчен җил аудару, кар басу, салкын аркасында ярылу кебек күңелсез күренешләр арта башлый. Һава температурасы ябалдаш зонасында 0-3 градус тирәсендә билгеләнгәч, ботакларда һәм агачларның кәүсәләрендә барлыкка килә торган боз катламнарыннан агачлар да зур зыян күрә башлый. Салкын яңгыр тамчылары ботакларга кунып, тора-бара шунда катып кала һәм тоташ боз хасил итә. Шулай итеп, бозлавык барлыкка килә.

Интенсив бозлавык аркасында боз катламы 3 см алып 5 см кадәр җитәргә мөмкин, ул очракта ботаклар боз сөңгеләренә әверелә. Арта барган боз катламы агачны җиргә бөгә торган урманнардагы мондый күренешләр еш күзәтелә. Ябалдашның рәвешенә һәм күләменә, юанлыгына карап, бозлавыклар агачларга төрлечә тәэсир итә. Хәтта агач кәүсәсе янтаерга мөмкин. Агачсыман таллар гадәттә күп кәүсәле була, аларның ябалдашлары куе һәм киң һәм бозлавык бу агачларның аерылуына китерә. Нарат, бигрәк тә үсенте чорында, бозлавык аркасында еш кына һәлак була. Кар һәм боз ябышканда чыршы сирәк сыгылып төшә, чөнки аның ботаклары болай да түбәнгә таба юнәлеш алган һәм су тиз арада агып төшеп китә, кәүсә өлешендә тупланырга өлгерми. Яфраклы токымнардан туры яфраклы усакка азрак зыян килә, анда кар да, боз да аз туплана. Куаклыклар бозлавыкны барыннан да яхшырак кичерә.

“Татарстан Республикасы ГМХИ” федераль дәүләт бюджет учреждениесе мәгълүматларына караганда, 11 ноябрьдә төнлә һәм 12 ноябрьдә иртән Татарстан Республикасы һәм Казан шәһәре территориясендә көчле бозлавык көтелә. Фаразланган метеошартларны исәпкә алып, Татарстан Республикасы Урман хуҗалыгы министрлыгы карамагындагы төбәк диспетчерлык идарәсе пунктларында тәүлек дәвамын кизү торулы көчәйтелгән эш режимы оештырылды.

2016 елның декабрендә Мәскәүдә “Линияле объектлар: хокукый җайга салу 2016 Кыш” ХII Россиякүләм конгрессы узачак. Чара кысаларында 9 декабрьдә “Балчуг Кемпински Москва” кунакханәсендә “Линияле объектларны урнаштыру өчен урман фонды җирләреннән файдалану: урман законнарында революцион үзгәрешләр” темасына россиякүләм конференция узачак.

Фикер алышулар мәйданында түбәндәге мәсьәләләр хакында сөйләшәчәкләр:

- 2016 елда урман кишәрлекләреннән файдалану өлешендә урман законнарындагы революцион үзгәрешләр.

- “Яшел щитлар” өлешендә, төрле урманнарда төзелешләргә кертү өлешендә урман мөнәсәбәтләрен җайга салуны камилләштерү (2017 елның 1 мартыннан башлап). Урман җирләреннән линияле объектларны төзү, үзгәртеп кору һәм эксплуатацияләү буенча файдалануны норматив-хокукый яктан җайга салу.

- Үзагач әзерләүдән аермалы булган башка төрле эшчәнлектә башкарыла торган урман кисүләр. Үзагачны урнаштыру һәм территорияне кисү эшләреннән соң чистарту.

- Урман законнарын бозган өчен административ һәм җинаять җаваплылыгы. Яңа суд тәҗрибәсе.

- Урман фонды җирләре составында урман кишәрлекләрен дәүләт кадастр исәбенә алу һәм хокукларны теркәү өлешендә яңа тәҗрибә. Кишәрлекләрне кисеп үтү, контурлык, вакытлыча үзлек.

Төгәлрәк программа һәм катнашу шартлары турында www.linear.asergroup.ru сайтында.

2016 елның 10 ноябрендә Татарстан Республикасының Урман хуҗалыгы министрлыгында ТР дәүләт гражданлык хезмәте вазифасы буенча кадрлар резервына кертүгә карата конкурсның икенче этабы узды. Билгеләнгән кагыйдәләр нигезендә һәм вакытында документларын тапшырган барлык кандидатлар да конкурска кертелде.

“ДжиЭмСи Консалтинг” компаниясе белгечләре ТР Урман хуҗалыгы министрлыгында дәүләт хезмәткәрләре эшенең нәтиҗәлелеген бәяләү буенча лекция үткәрде. Алар билгеләп үткәнчә, ел азагына кадәр барлык дәүләт хезмәте хезмәткәрләре дә шушы системага тоташтырылачак. Бу программа хезмәткәрнең хезмәтен бәяләргә, эшендәге кимчелекле урыннарны ачыкларга һәм аларны камилләштерү чараларын эшләргә булыша.

Татарстан Республикасы Министрлар Кабинеты карары белән ТР урман хуҗалыгы министрының беренче урынбасары итеп Әмир Нуретдин улы Бәдертдинов билгеләнде.

Ә.Н. Бәдертдинов 1969 елның 5 октябрендә Чуаш АССРның Батыр районы Татар Тимәше авылында туган. Мариның М.Горький ис. политехника институтын “Урман-инженерния эше” белгечлеге буенча тәмамлаган, инженер-технолог. Фәнни дәрәҗәсе бар – техник фәннәр кандидаты.

Ә.Н. Бәдретдинов хезмәт эшчәнлеген 1994 елда башлап җибәрә, карьерасында урман остасыннан башлап урманчылык җитәчесенә кадәр барлык үсеш баскычларын үтә. “Мари Иле Республикасының атказанган урманчысы” дәүләт бүләгенә, Федераль урман хуҗалыгы агентлыгының Мактау грамотасына, Мари Иле Республикасы Хакимиятенең Мактау грамотасына ия.

2016 елның 7 ноябреннән башлап Татарстан Республикасы урман хуҗалыгы министрының беренче урынбасары вазифасына кереште.

Россия Федерациясе Оборона министрлыгының “Урман хуҗалыгы идарәсе” ФДАУ белән Татарстан Республикасы Урман хуҗалыгы министрлыгы арасында “Оборонлес” махсус автоматлаштырылган мәгълүмат системасыннан файдалану турында килешү имзаланды. Әлеге программа 2017 елда сафка басачак. “Оборонлес” Татарстан Республикасы территориясендә термонокталарны оператив ачыклау мөмкинлеген бирәчәк, димәк, янгын чыккан урыннарга килү вакыты да, моңа бәйле чыгымнар да кимиячәк, бу урман фондында урман янгыннары мәйданнарын киметергә булышачак.

Агымдагы елның 11 ноябрендә “Арча урман хуҗалыгы” ДБУ базасында аз комплектлы урман әзерләүче бригадалар, югары җитештерелешле урман әзерләү комплекслары тарафыннан үзагач әзерләү процессын һәм хезмәтне саклау эшләрен оештыру буенча семинар-киңәшмә булачак. Семинар кысаларында 2016 елның 9 ае өчен ведомство буйсынуындагы учреждениеләрнең финанс-хуҗалык эшчәнлегенә йомгак ясалачак.

Татарстан Республикасы Урман хуҗалыгы министрлыгы хезмәткәрләре Халыклар бердәмлеге көненә багышланган чарада катнашты. Митинг-концерт Кремль яр буенча, Игенчеләр сарае янындагы скверда булды.

“Халыклар бердәмлеге көне” бәйрәме 2004 елның декабрендә Россия Президенты В.В. Путин тарафыннан имзаланган “Россиядә хәрби шөһрәт көннәре (җиңү көннәре) турында” Федераль законның 1 статьясына үзгәрешләр кертү хакында”гы Федераль закон нигезендә гамәлгә куела. Беренче мәртәбә халыкара бәйрәмне Россиядә 2005 елның 4 ноябрендә билгеләп үтәләр. Халыклар бердәмлеге көне 1612 елдагы вакыйгалар хөрмәтенә гамәлгә куела, ул чакта Кузьма Минин белән Дмитрий Пожарский җитәкчелегендәге халык ополчениесе Мәскәүне поляк интервентларыннан азат итә.

Татарстан Республикасы Урман хуҗалыгы министрлыгында Тайфик Дедебаш – “Кастамону Интегрейт Вуд Индастри” ҖЧҖ директорлары советы вәкиле җитәкчелегендәге төрек компаниясе делегациясе булып китте. Очрашу барышында яклар 2017 елда “Кастамону Интегрейт Вуд Индастри”  ҖЧҖ заводына үзагач китертү мәсьәләләре хакында сөйләштеләр.