ЯҢАЛЫКЛАР
16 ноябрьдә КНИТУ-КАИ институтында Дәүләт Советы Рәисе Фәрит Мөхәммәтшин катнашында “Төбәкләрнең тотрыклы үсеше: тәҗрибә, проблемалар, перспективалар” халыкара фәнни-гамәли конференциясе ачылды. Форум ике көнгә планлаштырылган, аның кысаларында экология һәм табигатьтән файдалану, экологик куркынычсызлык өлкәсендәге актуаль мәсьәләләрне, тотрыклы үсеш буенча социаль-икътисадый мәсьәләләрне, иминлекле әйләнә-тирә мохиткә хокукларны тәэмин итү буенча халыкара,
дәүләти һәм иҗтимагый чаралар системасын, Татарстанны экологик яктан тотрыклы үстерү өстенлекләрен карау күздә тотыла.
“Татарстанның чиста урманнары-2017” традицион табигать саклау акциясе Татарстан Республикасы Министрлар Кабинетының 2017 елның 31 мартындагы 605-р номерлы боерыгы нигезендә 15 сентябрьдән 15 ноябрьгә кадәр узды. Әлеге акциянең максаты – урманнарны иминлекле санитар торышта тоту, шулай ук әйләнә-тирә мохит проблемаларына халык игътибарын җәлеп итү.
Урманнарны чүп-чардан чистарту эшендә республикада яшәүче 10 мең тирәсе кеше катнашты. Активистлар автомобиль юллары тирәләрен һәм федераль һәм төбәк әһәмиятендәге трасса буйларын җыештырды, каты көнкүреш калдыклары, корыган ботаклар һәм ауган агачлар җыеп алынды. Урманнардан чыгарылган чүп күләме – 4175 м3.
Моннан тыш, акция кысаларында 157 мәгълүмат һәм рекреация объекты: урман фондында һәм автомобиль трассалары янәшәсендә урнаштырылган щитлар, аншлаглар, ял беседкалары төзекләндерелде, 21 чишмә чистартылды һәм тәртипкә китерелде.
Чиста урманнар – сәламәтлек нигезе, безнең киләчәк нигезе! Саф һава сулап, урманның аллы-гөлле төсләренә соклануы күпкә күңелле. Мең елларга урманны саклавы авыр түгел, бер кечкенә адым – һәм урман күп елларга сакланачак.
Халыкара хезмәттәшлек кысаларында Татарстан Республикасы Урман хуҗалыгы министрлыгы җитәкчелеге Финляндия делегатлары белән очрашты. Фин ягы республиканың урман тармагы өчен урман әзерләү техникасын китертүдә мәнфәгатьле. Быел Россия белән Финляндия арасында багланыш нигезләре турында шартнамәгә имза салынуга 25 ел тулды. Дәүләтләр арасында төбәкара дәрәҗәсендә мөнәсәбәтләрне үстерү мөмкинлеге саклана.
“Тату сыйныф серләре” республика конкурсында катнашу өчен Бөгелмә районының “Яшел патруль” мәктәп урманчылыгында белем алучылар “Экологик тәрбия” темасын сайлаган. Команданың визит карточкасы, презентация, күргәзмә һәм видеоролик – аларның барысы да урманга, әйләнә-тирә мохиткә сакчыл караш темасына багышланган: “Урман бар хәзинәсен кешегә бирә һәм моның өчен бары бер генә әйберне таләп итә – үзен саклауны. Һәм без үзебезнең яшел дустыбызны саклаячакбыз. Кешеләрнең урманнан сувенирларны: үсемлекләрне, бөҗәкләрне, кошларны, хайваннарны алып китмәвен күзәтеп торачакбыз, аларның барысы да иректә яшәргә тиеш. Ә кешеләр урманнан сәламәтлек һәм шәп кәеф алсыннар һәм урманны тагын да ямьләндерү хисләре белән тәэссирләнсеннәр.”
Ярышларның этаплардагы йомгаклары буенча “Яшел патруль” командасы конкурс финалына узды, анда район данын яклаячак. Табигатьнең яшь сакчыларына уңышлар телик!
Федераль урман хуҗалыгы агентлыгы тарафыннан “Яшә, урман!” россиякүләм акциясе оештырылды, ул Россия Федерациясендә инде алтынчы ел рәттән уза. Акциянең төп максаты – Россиянең урман байлыкларын саклау, торгызу һәм үрчетү проблемаларына, урман агачлары үсентеләрен һәм чәчкеннәрен утыртуга, урман турындагы белемнәрне таратуга булыша торган чараларны уздыруга игътибар җәлеп итү. Акция урман утырту, имән
чикләвекләрен, күркә һәм урман агачлары орлыкларын әзерләү, урман тематикасына бәйле чыгышлар ясау һәм күргәзмәләр уздыру, шулай ук урман территорияләрен чүп-чардан чистарту буенча россиякүләм иҗтимагый чара булып тора.
“Яшә, урман!” акциясенең бердәм зарури уздырылу форматы юк – Россия Федерациясенең һәр субъектында урманнар белән идарә итү органнары урман утыртуга, Россия урманнарын үрчетүгә юнәлдерелгән бүтән чараларга җәмәгатьчелекне үзенчә җәлеп итә.
Көзге “Яшә, урман!” акциясе алты ел эчендә Россия дәрәҗәсенә җитеп кенә калмыйча, халыкара диярлек булды – ул Россиянең 85 субъектын колачлый һәм 1 миллионнан артык кешене берләштерә. Шунысы әһәмиятле, ул урман хуҗалыгы хезмәткәрләреннән битәр, безнең урманнарыбызга, әйләнә-тирәлегебез проблемаларына битараф булмаган һәм агитацияләү, агарту һәм оештыру эшләрен башкаручы гражданнарны берләштерә. Аның төп бурычы Ватаныбызның урман байлыкларына, әйләнә-тирә мохитебезгә, планетабызга карата сакчыл мөнәсәбәт формалаштырудан гыйбарәт.
Гадәткә кергәнчә, акция 1 сентябрьдән 31 октябрьгә кадәр уздырыла, ягъни Россия Федерациясендәге күпчелек төбәкләрдә агач утырту мөмкинлеге юкка чыкканчы дәвам итә. Ләкин көньяк өлкәләрдә акциянең гамәлдә булу чоры ноябрь азагына кадәр озайтылырга мөмкин.
2017 елның һава торышына бәйле рәвештә “Яшә, урман!” россиякүләм акциясенә быел Россия Федерациясе табигать ресурслары һәм экология министры урынбасары – Федераль урман хуҗалыгы җитәкчесе Иван Валентик тарафыннан 2017 елның 11 августында старт бирелде. Тантаналы чара “XXI гасыр урман кисүчесе” Россия Чемпионатын уздыру кысаларында Архангельск өлкәсенең Устьян муниципаль районында узды. Агач утырту эшендә Федераль урман хуҗалыгы агентлыгы җитәкчесе Иван Валентик һәм Архангельск өлкәсе губернаторы Игорь Орлов катнашты, үзләренең үрнәгендә барлык Россия буенча уздырыла торган акциянең ни дәрәҗәдә кирәкле һәм әһәмиятле булуы турында күрсәттеләр.
“Яшә, урман!” акциясенең старт өлешендә барлык илдән диярлек урман мөнәсәбәтләрендә катнашучы хакимият органнары вәкилләре катнашты: Карелия, Коми, Татарстан Республикасы, Удмурт Республикасы, Хабаровск крае, Архангельск, Иркутск, Ленинград, Вологодск, Воронеж, Кострома һәм Нижегородск өлкәләре, Архангельск, Вологодск өлкәләрендәге иң зур урман әзерләү һәм урман эшкәртү компанияләре вәкилләре һәм мәктәп урманчылыкларында тәрбияләнүчеләр. Уртак тырышлык нәтиҗәсендә старт өлешендә истәлекле аллеяга нигез салынды.
2017 ел Россия Федерациясе Президенты Владимир Путин тарафыннан Экология елы итеп игълан ителде. Быел Россия территориясендә урман торгызу буенча күләмле эшләр уздыру планлаштырылган иде. Илдәге урманчыларның төп максаты – янганнан һәм корткыч бөҗәкләрдән зыян күргән территорияләрдә утыртылучы яшь агачлар хисабына урманнарның мәйданнарын арттыру.
Елдан-ел урман проблемаларына битараф булмаган һәм акциядә катнашучы гражданнарның саны арта бара. 2016 елда акцияне уздыру кысаларында төрле урман агачларының 25 тонна орлыгы әзерләнде һәм 25 миллионнан артык агач утыртылды. 2017 елда яхшы оештырылган эш нәтиҗәсендә, урман хуҗалыгы белгечләре тырышлыгы белән әлеге күрсәткечләрне арттыру мөмкин булды. 54,7 мең кг артык урман-орлык чималы хәстәрләнде. 29,3 миллион агач утыртылды.
Россия Федерациясе территориясендә урман торгызу эшләре 2016 елда 842,7 мең гектар мәйданда башкарылды. Бу вакытта шунысын истә тоту мөһим: 2017 елның урман культуралары чоры Россиянең барлык субъектларында да тәмамланмады әле, бу исә быелга планлаштырылган 945 мең гектарда урман торгызу эшләрен башкаруга бәйле рекорд күрсәткечләргә ирешү өчен вакыт җитәрлек дигән сүз!
“Яшә, урман!” россиякүләм акциясе кысаларында 2017 елда урман фонды җирләрендә барлыгы 4 мең гектарда урман утыртмалары булдырылды, башка категориягә караучы җирләрдә – 538 гектардагы паркларда һәм скверларда 5,7 мең гектар истәлекле аллеяларга һәм агачларга нигез салынды. Шул рәвешле, россиякүләм акциядә катнашучыларның тырышлыгы белән, урман утыртмаларын утырту буенча хәерле гамәл 10,2 мең гектардан артып китте. Шул ук вакытта бер ел элек бу күрсәткеч 6 мең гектар гына иде.
“Яшә, урман!” россиякүләм акциясе чараларында 1,4 миллионнан артык кеше катнашты. 2017 елда ул сәяси, мәдәни һәм иҗтимагый элита вәкилләрен, фән эшлеклеләрен, сәнгать һәм мәдәният хезмәткәрләрен, дәүләт хакимияте органнары вәкилләрен һәм Россия Федерациясендә яшәүче аңлы гражданнарны берләштерде.
Татарстан Республикасы Урман хуҗалыгы министрлыгы яңа ел бәйрәмнәренә Татарстан Республикасының 31 урманчылыгы буенча урман фонды территориясендә урнашкан чыршыларны һәм (яисә) ылыслы башка токым агачларын әзерләү өчен урман утыртмаларын сату-алу шартнамәләре төзүгә хокук сату буенча 2017 елның 2 ноябрендә булып узган аукцион йомгаклары турында хәбәр итә.
31 лот буенча аукцион узмаган дип танылды (РФ УК 80 статьясының 7 пунктындагы 1 пунктчасы). Аукциондагы бердәнбер катнашучылар белән беркетмәләр имзалана һәм аукцион нәтиҗәләре турында “Интернет” мәгълүмати-телекоммуникация челтәрендә Россия Федерациясе рәсми сайтында мәгълүмат урнаштырылган көннән соң ун көн узгач шартнамәләр төзелә.
2017 елның 1 ноябрендә Татарстан Республикасы Урман хуҗалыгы министрлыгында Татарстан Республикасы дәүләт граждан хезмәтенең вакантлы дәүләт контроле һәм күзәтчелеге бүлегенә әйдәп баручы консультант вазыйфасын биләүгә конкурс булып узды.
2017 елның 10 аенда төп урман хасил итүче токымнарның орлыкларын әзерләү күләме 2494 кг тәшкил итте, шуның 1184 кг – ылыслы токым (шул исәптән 605 кг – гади нарат, 285 кг – Европа чыршысы,291 кг – Себер карагае орлыгы) һәм 1310 кг – яфраклы токым (шул исәптән 650 кг – сабаклы имән һәм 550 кг – иенке каен). Хәзерге вакытта ылыслы токым орлыкларын әзерләү буенча “Арча урман хуҗалыгы” ДБУ, “Алабуга урман хуҗалыгы” ДБУ, “Кайбыч махсус орлыкчылык урман хуҗалыгы” ДБУ, “Мамадыш урман хуҗалыгы” ДБУ, “Минзәлә урман хуҗалыгы” ДБУ һәм “Саба укыту-тәҗрибә урман хуҗалыгы” ДБУ лидер булып тора.
Бүген Татарстан Республикасы Урман хуҗалыгы министрлыгында “Ведомствога буйсынучы учреждениеләрдә урманнарны саклау, яклау һәм яңадан җитештерү буенча чараларны гамәлгә ашыру, урманнарны яклау буенча чаралар үткәрелергә тиешле урман кишәрлекләре реестрын һәм хисап белешмәләрен алып бару” темасына киңәшмә булып узды. Утырышта Министрлык Аппараты белгечләре, Урманны яклау үзәге вәкилләре, җитәкче-урманчылар һәм урман хуҗалыгы инженерлары катнашты. Киңәшмә барышында юридик затлар һәм шәхси эшкуарлар тарафыннан хокук бозылуларны кисәтү төрләре һәм чаралары, зарури таләпләрне бозуга китерә торган сәбәпләрне, факторларны һәм шартларны юкка чыгару чаралары каралды.
“Урман ташу” ведомствоара оператив-профилактика чарасына йомгак ясалды. Бу операцияне ел азагына кадәр озайту һәм хокук саклау органнары белән бергәләшеп уздырыла торган рейдларның санын арттыру турында карар кабул ителде. Кисү материалларын транспортлауга аеруча зур игътибар юнәлтелде: законнардагы үзгәрешләрне исәпкә алырга кирәклегенә басым ясалды. Шулай ук законнарга кертелгән, санитар-савыктыру чараларын уздыруга һәм халыкка шәхси ихтыяҗлары өчен агач җибәрүгә бәйле яңа үзгәрешләр дә каралды. Гражданнарның шәхси ихтыяҗлары өчен урман утыртмаларын сату-алу шартнамәләрен төзегәндә еш очрый торган кисәтүләр билгеләп үтелде.
“Рослесозащита” ФДБУ филиалы “Татарстан Республикасы Урман яклау үзәге” белән хезмәттәшлек итү турында гамәлдә булган килешү кысаларында филиал хезмәткәрләре һәм филиал җитәкчесе чыгыш ясады. Урманнарны яңадан җитештерү һәм урман үрчетү темасына зур игътибар бирелде. Асылда урман культураларын утырту, урман культураларын урман белән капланган җирләргә күчереп утырту, агротехник яктан тәрбияләү һәм туфрак әзерләү, шулай ук урманчылыкларда документларны һәм хисапларны рәсмиләштерү буенча эшләр хакында сөйләштеләр.
Татарстан Республикасы Урман хуҗалыгы министрлыгы 2017-2018 елгы Яңа ел алды сезонында урман утыртмаларын (Яңа ел чыршыларын, наратларын, ылыслы ботакларны) алу-сату килешүен төзүгә хокукны сату буенча аукцион уздыру турында игълан итә. Аукцион 2017 елның 2 ноябрендә 12.00 сәгатьтә 420124, Казан ш., Ямашев проспекты, 37А й., 4 кат. 416, 420 каб. адресы буенча уздырыла. Телефон: (843) 221-37-42(43). Аукционга 31 лот куелган (барлык урманчылыклар буенча).
Хәбәр язуы һәм аукцион документлары Россия Федерациясенең “Интернет” мәгълүмат-телекоммуникация челтәрендәге рәсми сайтына (www.torgi.gov.ru) урнаштырылган. Анда түбәндәге мәгълүматлар бар: аукционны оештыручы турында; аукцион предметы, шул исәптән урман утыртмаларының урнашу урыны турында, урман кишәрлекләренең мәйданы һәм чикләре турында, әзерләнергә тиешле урман ресурсларының күләме турында, урман кишәрлекләре белән эш итүгә комачаулыклар турында, урманнардан файдалануның чикләнүе турында, урман кишәрлекләренең кадастр номерлары турында, урманнардан файдалану төрләре һәм урман хуҗалыгы регламенты билгеләп куйган параметрлары турында; аукционда катнашуга гаризалар бирү урыны, бирү срогының башлану һәм тәмамлану көннәре һәм аукционны уздыру көне турында; аукцион предметының башлангыч бәясе (әзерләнүче агач материалының башлангыч бәясе) турында; аукцион нәтиҗәләре буенча урман утыртмаларын алу-сату килешүе төзелергә тиешле срок турында; урман утыртмаларының урнашу урыны турында мәгълүматлар; аукцион предметының башлангыч бәясен күтәрү зурлыгы (“аукцион адымы”) турында мәгълүматлар; аукционда катнашуга гариза формасы, аны бирү тәртибе һәм сроклары турында мәгълүматлар; задаток күләме, аны кертү срогы һәм тәртибе турында мәгълүматлар, задаток күчерү өчен счет реквизитлары; урман утыртмаларын алу-сату килешүе проекты.