ЯҢАЛЫКЛАР
“Корстон” мәдәният комплексында Татарстан урман хуҗалыгы эшчәннәренә бүләкләр тапшырылды.
Һөнәри бәйрәм – Урман эшчәннәре көненә багышланган тантаналы чарада ТР Премьер-министры урынбасары В.Г.Шәйхразиев, Идел буе федераль округының Урман хуҗалыгы департаменты башлыгы А.Н.Орнатский катнашты.
Алар Татарстан Республикасының урман хуҗалыгы эшчәннәренә бүләкләр тапшырдылар.
Татарстан Республикасы Президенты Указы белән күпьеллык намуслы хезмәтләре, югары һөнәри осталыклары һәм Татарстан Республикасының урманчылык тармагын үстерүгә керткән шәхси өлешләре өчен “Татарстан Республикасының атказанган урманчысы” мактау билгесе бирелде:
– Исмәгыйлев Ибраһим Исхаковичка (“Идел буе урманчылыгы” ДКО җитәкче-урманчысы);
– Талипов Рашат Мидхәтовичка (“Саба урманчылыгы” ДКО урманнан файдалану инженеры).
Татарстан Республикасының “Фидакарь хезмәт өчен” медале белән бүләкләнде:
– Ганиева Әлфия Кадыйровна, Татарстан Урман хуҗалыгы министрлыгының финанслар, бухгалтер исәбе һәм контроль бүлеге башлыгы.
Татарстан Республикасы Президентының Рәхмәт хаты белән бүләкләнде:
– Афанасьев Николай Григорьевич, “Кама урманчылыгы” ДКО Шомарбаш участок урманчылыгының урман мастеры;
– Төхвәтуллин Наил Рәшитович, “Ары урманчылыгы” ДКО җитәкче-урманчысы.
“Урман хуҗалыгының мактаулы хезмәткәре” күкрәк билгесе белән бүләкләнде:
– Хаффазов Илгиз Хаффазович, “Кайбыч урманчылыгы” ДКО җитәкче-урманчысы:
Урман хуҗалыгы федераль агентлыгының Мактау грамотасы белән бүләкләнде:
– Федоров Сергей Васильевич, “Саба өйрәнү-тәҗрибә урман хуҗалыгы” ДБО шоферы;
– Ханнанова Кәсирә Тимерхановна, “Минзәлә урманы” ДБО бухгалтеры;
– Маркелов Александр Прокопьевич, Саба өйрәнү-тәҗрибә урман хуҗалыгы агач эшкәртү комплексының чатлы төягеч йөртүчесе.
Татарстан Республикасы Урман хуҗалыгының Мактау грамотасы белән бүләкләнде:
– Гобәйдуллин Ленар Дамирович, “Урман янгыны үзәге” ДБО “Биектау” 3нче типтагы янгын-химия станциясе башлыгы;
– Степанова Раиса Анатольевна, “Лениногорск урманчылыгы” ДКО урман яңарту инженеры;
– Хәбибуллин Габделхәй Әхәтович, “Кама урманчылыгы” ДКО Берсут участок урманчылыгының участок урманчысы;
– Шәрипова Нәфисә Азатовна, “Яшел Үзән урманчылыгы” ДКО кадрлар белгече;
– Минһаҗев Илһам Шәфигуллович, “Урман транспорт компаниясе” ААҖ генераль директоры;
– Каһиров Илшат Әсгатович, “Урман транспорт компаниясе” ААҖ шоферы;
– Мөбәрәкова Әлфия Галимҗановна, “Татмедиа” ААҖ “Саба дулкыннары” телевидение компаниясе директоры;
– Низаметдинова Айгөл Рәфкатовна, “Эфир” телекомпаниясенең “Шәһәр” программасы редакторы;
– Любимов Михаил Борисович, “Яңа гасыр” телекомпаниясенең “Җиде көн” иҗат берләшмәсе җитәкчесе.
Бүген “Алабуга” махсус экономик зонасында “Кастамону Энтегре” Төркия компаниясенең МДФ-панельләр һәм агач идән түшәмәләре чыгару заводы эшкә кушылды. Тантанада Татарстан Президенты Рөстәм Миңнеханов, Төркия урман хуҗалыгы һәм су ресурслары министры Вейсел Эроглу, “Хаят холдинг” компаниясе президенты Әхмәт Яхъя Кыгылы, ТР Премьер-министры Илдар Халиков, Россия Федерациясе индустрия һәм сәүдә министры урынбасары Георгий Каламанов катнашты.
“Урманчылар ишек ача” бөтенроссия акциясе кысаларында җитәкче-урманчы урынбасары Фәнил Фазлыев укучылар өчен урман буйлап экскурсия үткәрде, аларга урманның ничек үсүе һәм яшәве турында сөйләде. Маршрут Лаеш урманчылыгы питомнигыннан башланды. Питомниктагы эшләрне күзәтеп балалар һәр агач үсентесенә күпме хезмәт салынуын күрделәр. Экскурсия умарталыкта төгәлләнде, анда исә мәктәп укучылары үзләрен умартачы эшендә сынап карадылар. Иң соңыннан урман хуҗалары әзерләгән чәй табынында сыйландылар.
“Алабуга” махсус экономик зонасында узачак тантаналы чарада Төркия Республикасының урман хуҗалыгы һәм су ресурслары министры Вейсел Эроглу һәм Татарстан урман хуҗалыгы министры в.б. Харис Мусин да катнашачак.
Экологик чисталык көнендә мәктәп укучылары көзге урманга барып, урманның ничек үсүе, урманчыларның эш үзенчәлекләре турында белештеләр. “Норлат урманчылыгы” ДКО Чулпан участок урманчылыгының урман мастеры Тәүфыйк Азизов белән бергә яшь үсентеләр утырттылар.
Норлат урманчылыгының Мамык участогы урман белгече Наилә Сафиуллина Мамык урта мәктәбендә укучыларны Урман эшчәннәре көне алдыннан көзге урманда йөреп кайтырга чакырды. Ул анда балаларга участокта үсә торган агач токымнары, урман саклауның үзенчәлекләре, урманчы һөнәре, урманда үз-үзеңне тоту кагыйдәләре турында сөйләде.
Урман хуҗалыгындагы кебек көчле традицияләр, буыннар бәйләнеше экономиканың бүтән бер тармагында да юк. Көздә үткәрелә торган Урман хуҗалыгы эшчәннәре көнендә һәм Халыкара өлкәннәр көнендә тармак оешмаларында үз гомерләрен республикабыз урманнарын саклауга һәм арттыруга багышлаган ветераннар белән җылы очрашулар оештырыла. Мәсәлән, Әгерҗе урманчылыгында җитәкче-урманчы А.М.Данилов ветераннарны чәй эчәргә чакырды, алар анда урманчылыкның бүгенге хәле турында белештеләр, электәге эшләре искә төшерделәр.
Хөрмәтле урман хуҗалыгы эшчәннәре!
Тармакның кадерле ветераннары!
Татарстан Республикасы исеменнән сезне һөнәри бәйрәмегез – Урман эшчәннәре көне белән чын күңелдән котлыйм.
Табигать безгә бәяләп бетергесез байлык, сөенеч һәм саулык чыганагы – урман бүләк иткән. Шул байлыкны саклау, арттыру һәм бәрәкәтле файдалану – һәркемнең бурычы. Безнең бу заманда индустриянең һәм шәһәрләрнең бик тиз үсүе урманнарны саклау мәсьәләсен тагы да кискенләштерде. Бу урманнары 1.2 млн гектар мәйданны биләп торган безнең республикага да кагыла.
Бүген Татарстан Республикасының урман хуҗалыгы актив рәвештә яңартыла: Европада иң зур булган Урман селекция-орлыкчылык үзәге ачылды, урманнарны янгыннан саклау өчен 3нче типтагы янгын-химия станцияләре булдырылды, яңа урманлыкларга нигез салынды, агач әзерләү эшләре сортимент технологиясе буенча алып барыла.
Урман хуҗалыгы тармагындагы барлык уңай үзгәрешләр һәм уңышлар – тармакның алтын кадрлары керткән өлеш ул. Республикабызда агач әзерләүчеләр һәм эшкәртүчеләр, экологлар, урманчылар – үз эшләренә чын күңелдән бирелгән югары квалификацияле белгечләр 7 меңнән артык.
Иң яхшы елларын яраткан эшләренә багышлап үткәргән урман хуҗалыгы ветераннарына да иң җылы теләкләремне юллыйм. Шунысы күңелле – сезнең хезмәтләрегез аркылы салынган традицияләр кадерләп саклана һәм яшь буынга тапшырыла.
Татарстан урман хуҗалыгының киләчәге зур. Сезнең ярдәмнәр белән тармак алдында торган барлык олы бурычларны үтәп чыгарга, урман комплексын чын-чынлап конкуренциягә сәләтле итәргә мөмкин булыр дип ышанам.
Республикабызның урман байлыкларын яклаучы һәм арттыручыларның барысына да уңышлар телим.
Татарстан Республикасы Президенты Рөстәм Миңнеханов
Сез мөһим һәм игелекле һөнәр ияләре, сезгә урман байлыкларыбызны саклау, бәрәкәтле файдалану һәм арттыру кебек җаваплы бурыч йөкләнелгән. Сезнең аркада планетабыз яшел кала бирә, һәм без кислородлы һава сулыйбыз.
Ислам кешеләргә Аллаһ Тәгалә тарафыннан бирелгән планета байлыкларына сак карарга куша. Бәяләп бетергесез табигатебезне киләчәк буыннар өчен саклау җаваплылыгы һәрберебезгә йөкләнгән.
Кеше үзе яшәгән дөньялыкка бәйле, ул аны юк итәргә хаклы түгел. Аллаһ исә үзе дә күркәм, күркәмлекне ярата да, һәм табигатьне Ул кеше күзенә хуш килерлек итеп яралткан.
Мөхәммәт пәйгамбәр (саллаллаһу галәйһи вәссәлам): “Агач утыртучы һәм аны җимеш бирә башлаганчы карап үстерүче кеше ахырда әҗерен күрер”, – дигән.
Урман бөтен илебезнең олы хәзинәсе булып тора, һәм нәкъ менә сез, урман эшчәннәре, төбәгебезне, аның барлык хуҗалык тармакларын бик тә кирәкле агач һәм аннан ясалган әйберләр белән тәэмин итәсез.
Барлык урман эшчәннәренә ныклы сәламәтлек, Татарстан Республикасы урманнарын саклау һәм арттыру эшендә зур уңышлар теләп калам.
Һәр кеше хезмәтенең, тактик һәм стратегик бурычларны үтәүдән тыш, үз миссиясе, үз философиясе булырга тиеш. Алла яралткан һәр нәрсәгә сакчыл мөнәсәбәт һәркемгә ана сөте белән кергән сыман тоелса да, еш кына без бөтенләй капма-каршы хәлләрне очратабыз. Үкенечкә каршы кеше, еш кына гөнаһлы ымсынуларга бирелеп китеп, ахырда үз тормышына турыдан-туры йогынты ясый торган нәрсәләрне юкка чыгара. Бу урманнарыбызга карата да шулай. Һәм нәкъ менә сез безгә Алла биргән шул гүзәллекне яклау кебек авыр бурычны башкарасыз, урманнарыбызны саклап игелек кыласыз. Аннан тыш, нәкъ менә сезнең тармак республикабыз халкы тарыган яман бәла-каза – православие храмнарын яндыру вакытында ярдәмгә килде. Хәзер инде ул урыннарда яңа чиркәүләр тора, диндар кешеләр анда инде яңадан Аллага табына алалар, ул гыйбадәтханәләрдә хәзердән алып йөзләрчә ел буе аларны төзүчеләр хакына да догалар укылыр!
Мин, Алла саклаган Казан җирендәге барча диндарлар исеменнән барча хезмәт ияләренә рәхмәтләр һәм изге теләкләр җиткерергә телим! Бирелгән мөмкинлектән файдаланып, барыгызны да һөнәри бәйрәмегез белән котлыйм, һәр ниятегездә Алла ярдәме, ныклы тән һәм җан көчләре, шулай ук тынычлык, игелек һәм уңышлыклар теләп калам! Алла сезне ярдәмнәреннән ташламасын!