ЯҢАЛЫКЛАР

“Бөгелмә урманчылыгы” ДКУда һәм “Бөгелмә урман хуҗалыгы” ДБУда 3 квартал йомгаклары буенча семинар-киңәшмә Петровский участок урманчылыгы базасында булды. Чарада участок урманчылары, мастерлар, Харвестерлар һәм Форвардерлар операторлары, урман әзерләү бригадалары катнашты. Киңәшмә барышында урман фондының Россия Федерациясе милке булып торучы җирләрендә урманнарны саклау, яклау һәм тернәкләндерү буенча башкарылган эшләр буенча участоклар карап чыгылды. Урман кисү урыннарын бүлеп бирүнең һәм документларны тутыруның, урман законнары бозылу турында актларны төзүнең дөреслегенә аерым игътибар бирелде. Тыңлаучылар алдында җитәкче-урманчы Г.З. Мөхәммәтханова, Петровский участок урманчылыгының участок урманчысы С.В. Дятлов, җитәкче-урманчының урынбасары А.В. Улаев чыгыш ясадылар. Семинар-киңәшмә тәмамланганнан соң урманнардагы куркынычсызлык техникасы турында инструктаж үткәрделәр.

14-16 ноябрь көннәрендә Лубян урман-техника көллиятендә ел саен уза торган “Студент көзе-2017” фестивале булды. Беренче курска килгән студентлар арасында талантлар күп иде. Студент чоры – ул аерым, кечкенә тормыш, дип тиккә генә әйтмәгәннәр. Без ышанабыз, бу чара аларның студент елларына багышланган хатирәләрендә күренекле һәм ямьле эз калдырыр. Лубян урман-техника көллиятендә укучыларның барысына да укуларының “Студент көзе” фестивале сәхнәсендәге кебек уңышлы һәм позитив баруын теләп калабыз.

РФ табигать ресурслары һәм экология министры урынбасары – Федераль урман хуҗалыгы агентлыгы җитәкчесе Иван Валентик доклад белән чыгыш ясаганда болай диде: “Соңгы егерме ел эчендә безнең илдә урман законнары берничә мәртәбә радикаль рәвештә үзгәртелде, урманнар белән дәүләт идарәсе төзелеше һәм вазыйфалары берничә мәртәбә үзгәртеп корылды. Урман кодексы кабул ителгән вакытында аеруча дискуссияле документ булган иде. Документны кабул итүгә һәм аннан соңгы имплементацияләүгә бәйле ул дебатлар бүген дә дәвам итә.

Урман ресурслары россиялеләрнең иҗтимагый-сәяси һәм икътисадый эшчәнлегендә һәрвакыт уникаль һәм әһәмиятле урыннарны алып торды. Урман ресурслары белән нәтиҗәле идарә итү – кирәкле корал ул, аның ярдәмендә дәүләт җәмәгатьне катнаштыру өчен, халык ихтыяҗларына карата тотрыклы үсешкә һәм кабул итүчәнлеккә алып бара һәм Россия Федерациясенең илкүләм стратегик өстенлеге буларак карала торган, төбәк өчен әһәмиятле һәм ачык булган сәясәтне уздырырга мөмкин һәм тиеш”.

Утырышта катнашучылар урманнардан файдалану, законсыз кисү һәм урман торгызу темалары, урманнарны янгыннардан саклау һәм корткычлардан яклау, агач материалын эшкәртүче предприятиеләргә – эшкәртүчеләргә закон ягыннан булышлыкны арттыру темалары, шулай ук урман хуҗалыгына теге яки бу дәрәҗәдә бәйле башка темалар хакында сөйләште.

– Контроль-күзәтчелек вазыйфалары балансы, урманнардан файдалануның нәтиҗәлелеге, агач сату-алу күзлегеннән чыгып караганда вәкаләтләр бүлү мәсьәләсе... Бүген без дикорослар темасы хакында фикер алыштык. Һәм бу, чыннан да, әһәмиятле темалар, алар эшкәртүне таләп итә. Дәүләт Думасының Табигать ресурслары, мөлкәт һәм җир мөнәсәбәтләре буенча комитеты рәисе Николай Николаев безне туплаган мәйданда урман хуҗалыгының һәм катнаш өлкәләрнең абсолют дәрәҗәдә барлык аспектлары, юнәлешләре күрсәтелде. Һичшиксез, бик күп сораулар туды, алар иң югары дәрәҗәдә карарлар кабул итүне таләп итә. Һәм шунысы әйбәт: бу

мәсьәләләрне хәл итү өчен тармакның барлык төбәкләрендәге вәкилләре дә җыелды. Бу диалог бик файдалы. Хәзерге вакытта без урманнарны тәртипкә китерүнең яңа Концепциясен әзерлибез, аның хакында 5 декабрьдә Новосибирскида фикер алышачакбыз. Мин ышанам, бүгенге тыңлаулардан алынган нәтиҗәләр, чара йомгаклары буенча кабул ителәчәк карарлар Россиябезнең урман хуҗалыгына файда китерер һәм киләчәк буыннар өчен табигать байлыкларын сакларга ярдәм итәр, – дип ассызыклады Рослесхоз башлыгы Иван Валентик булып узган чараның әһәмиятелеге хакында.

Татарстан Республикасының Урман хуҗалыгы министрлыгы 2017 елның 23 ноябрендә һәм 5 декабрендә кече һәм урта эшкуарлык субъектларына урман утыртмаларын сату-алу шартнамәләрен төзүгә хокук сату буенча аукцион уздырылачагы турында хәбәр итә. Аукцион буенча тулырак мәгълүматларны 221-37-42 телефоны аша белешергә мөмкин.

16 ноябрьдә КНИТУ-КАИ институтында Дәүләт Советы Рәисе Фәрит Мөхәммәтшин катнашында “Төбәкләрнең тотрыклы үсеше: тәҗрибә, проблемалар, перспективалар” халыкара фәнни-гамәли конференциясе ачылды. Форум ике көнгә планлаштырылган, аның кысаларында экология һәм табигатьтән файдалану, экологик куркынычсызлык өлкәсендәге актуаль мәсьәләләрне, тотрыклы үсеш буенча социаль-икътисадый мәсьәләләрне, иминлекле әйләнә-тирә мохиткә хокукларны тәэмин итү буенча халыкара,

дәүләти һәм иҗтимагый чаралар системасын, Татарстанны экологик яктан тотрыклы үстерү өстенлекләрен карау күздә тотыла.

“Татарстанның чиста урманнары-2017” традицион табигать саклау акциясе Татарстан Республикасы Министрлар Кабинетының 2017 елның 31 мартындагы 605-р номерлы боерыгы нигезендә 15 сентябрьдән 15 ноябрьгә кадәр узды. Әлеге акциянең максаты – урманнарны иминлекле санитар торышта тоту, шулай ук әйләнә-тирә мохит проблемаларына халык игътибарын җәлеп итү.

Урманнарны чүп-чардан чистарту эшендә республикада яшәүче 10 мең тирәсе кеше катнашты. Активистлар автомобиль юллары тирәләрен һәм федераль һәм төбәк әһәмиятендәге трасса буйларын җыештырды, каты көнкүреш калдыклары, корыган ботаклар һәм ауган агачлар җыеп алынды. Урманнардан чыгарылган чүп күләме – 4175 м3.

Моннан тыш, акция кысаларында 157 мәгълүмат һәм рекреация объекты: урман фондында һәм автомобиль трассалары янәшәсендә урнаштырылган щитлар, аншлаглар, ял беседкалары төзекләндерелде, 21 чишмә чистартылды һәм тәртипкә китерелде.

Чиста урманнар – сәламәтлек нигезе, безнең киләчәк нигезе! Саф һава сулап, урманның аллы-гөлле төсләренә соклануы күпкә күңелле. Мең елларга урманны саклавы авыр түгел, бер кечкенә адым – һәм урман күп елларга сакланачак.

Халыкара хезмәттәшлек кысаларында Татарстан Республикасы Урман хуҗалыгы министрлыгы җитәкчелеге Финляндия делегатлары белән очрашты. Фин ягы республиканың урман тармагы өчен урман әзерләү техникасын китертүдә мәнфәгатьле. Быел Россия белән Финляндия арасында багланыш нигезләре турында шартнамәгә имза салынуга 25 ел тулды. Дәүләтләр арасында төбәкара дәрәҗәсендә мөнәсәбәтләрне үстерү мөмкинлеге саклана.

“Тату сыйныф серләре” республика конкурсында катнашу өчен Бөгелмә районының “Яшел патруль” мәктәп урманчылыгында белем алучылар “Экологик тәрбия” темасын сайлаган. Команданың визит карточкасы, презентация, күргәзмә һәм видеоролик – аларның барысы да урманга, әйләнә-тирә мохиткә сакчыл караш темасына багышланган: “Урман бар хәзинәсен кешегә бирә һәм моның өчен бары бер генә әйберне таләп итә – үзен саклауны. Һәм без үзебезнең яшел дустыбызны саклаячакбыз. Кешеләрнең урманнан сувенирларны: үсемлекләрне, бөҗәкләрне, кошларны, хайваннарны алып китмәвен күзәтеп торачакбыз, аларның барысы да иректә яшәргә тиеш. Ә кешеләр урманнан сәламәтлек һәм шәп кәеф алсыннар һәм урманны тагын да ямьләндерү хисләре белән тәэссирләнсеннәр.”

Ярышларның этаплардагы йомгаклары буенча “Яшел патруль” командасы конкурс финалына узды, анда район данын яклаячак. Табигатьнең яшь сакчыларына уңышлар телик!

Федераль урман хуҗалыгы агентлыгы тарафыннан “Яшә, урман!” россиякүләм акциясе оештырылды, ул Россия Федерациясендә инде алтынчы ел рәттән уза. Акциянең төп максаты – Россиянең урман байлыкларын саклау, торгызу һәм үрчетү проблемаларына, урман агачлары үсентеләрен һәм чәчкеннәрен утыртуга, урман турындагы белемнәрне таратуга булыша торган чараларны уздыруга игътибар җәлеп итү. Акция урман утырту, имән

чикләвекләрен, күркә һәм урман агачлары орлыкларын әзерләү, урман тематикасына бәйле чыгышлар ясау һәм күргәзмәләр уздыру, шулай ук урман территорияләрен чүп-чардан чистарту буенча россиякүләм иҗтимагый чара булып тора.

“Яшә, урман!” акциясенең бердәм зарури уздырылу форматы юк – Россия Федерациясенең һәр субъектында урманнар белән идарә итү органнары урман утыртуга, Россия урманнарын үрчетүгә юнәлдерелгән бүтән чараларга җәмәгатьчелекне үзенчә җәлеп итә.

Көзге “Яшә, урман!” акциясе алты ел эчендә Россия дәрәҗәсенә җитеп кенә калмыйча, халыкара диярлек булды – ул Россиянең 85 субъектын колачлый һәм 1 миллионнан артык кешене берләштерә. Шунысы әһәмиятле, ул урман хуҗалыгы хезмәткәрләреннән битәр, безнең урманнарыбызга, әйләнә-тирәлегебез проблемаларына битараф булмаган һәм агитацияләү, агарту һәм оештыру эшләрен башкаручы гражданнарны берләштерә. Аның төп бурычы Ватаныбызның урман байлыкларына, әйләнә-тирә мохитебезгә, планетабызга карата сакчыл мөнәсәбәт формалаштырудан гыйбарәт.

Гадәткә кергәнчә, акция 1 сентябрьдән 31 октябрьгә кадәр уздырыла, ягъни Россия Федерациясендәге күпчелек төбәкләрдә агач утырту мөмкинлеге юкка чыкканчы дәвам итә. Ләкин көньяк өлкәләрдә акциянең гамәлдә булу чоры ноябрь азагына кадәр озайтылырга мөмкин.

2017 елның һава торышына бәйле рәвештә “Яшә, урман!” россиякүләм акциясенә быел Россия Федерациясе табигать ресурслары һәм экология министры урынбасары – Федераль урман хуҗалыгы җитәкчесе Иван Валентик тарафыннан 2017 елның 11 августында старт бирелде. Тантаналы чара “XXI гасыр урман кисүчесе” Россия Чемпионатын уздыру кысаларында Архангельск өлкәсенең Устьян муниципаль районында узды. Агач утырту эшендә Федераль урман хуҗалыгы агентлыгы җитәкчесе Иван Валентик һәм Архангельск өлкәсе губернаторы Игорь Орлов катнашты, үзләренең үрнәгендә барлык Россия буенча уздырыла торган акциянең ни дәрәҗәдә кирәкле һәм әһәмиятле булуы турында күрсәттеләр.

“Яшә, урман!” акциясенең старт өлешендә барлык илдән диярлек урман мөнәсәбәтләрендә катнашучы хакимият органнары вәкилләре катнашты: Карелия, Коми, Татарстан Республикасы, Удмурт Республикасы, Хабаровск крае, Архангельск, Иркутск, Ленинград, Вологодск, Воронеж, Кострома һәм Нижегородск өлкәләре, Архангельск, Вологодск өлкәләрендәге иң зур урман әзерләү һәм урман эшкәртү компанияләре вәкилләре һәм мәктәп урманчылыкларында тәрбияләнүчеләр. Уртак тырышлык нәтиҗәсендә старт өлешендә истәлекле аллеяга нигез салынды.

2017 ел Россия Федерациясе Президенты Владимир Путин тарафыннан Экология елы итеп игълан ителде. Быел Россия территориясендә урман торгызу буенча күләмле эшләр уздыру планлаштырылган иде. Илдәге урманчыларның төп максаты – янганнан һәм корткыч бөҗәкләрдән зыян күргән территорияләрдә утыртылучы яшь агачлар хисабына урманнарның мәйданнарын арттыру.

Елдан-ел урман проблемаларына битараф булмаган һәм акциядә катнашучы гражданнарның саны арта бара. 2016 елда акцияне уздыру кысаларында төрле урман агачларының 25 тонна орлыгы әзерләнде һәм 25 миллионнан артык агач утыртылды. 2017 елда яхшы оештырылган эш нәтиҗәсендә, урман хуҗалыгы белгечләре тырышлыгы белән әлеге күрсәткечләрне арттыру мөмкин булды. 54,7 мең кг артык урман-орлык чималы хәстәрләнде. 29,3 миллион агач утыртылды.

Россия Федерациясе территориясендә урман торгызу эшләре 2016 елда 842,7 мең гектар мәйданда башкарылды. Бу вакытта шунысын истә тоту мөһим: 2017 елның урман культуралары чоры Россиянең барлык субъектларында да тәмамланмады әле, бу исә быелга планлаштырылган 945 мең гектарда урман торгызу эшләрен башкаруга бәйле рекорд күрсәткечләргә ирешү өчен вакыт җитәрлек дигән сүз!

“Яшә, урман!” россиякүләм акциясе кысаларында 2017 елда урман фонды җирләрендә барлыгы 4 мең гектарда урман утыртмалары булдырылды, башка категориягә караучы җирләрдә – 538 гектардагы паркларда һәм скверларда 5,7 мең гектар истәлекле аллеяларга һәм агачларга нигез салынды. Шул рәвешле, россиякүләм акциядә катнашучыларның тырышлыгы белән, урман утыртмаларын утырту буенча хәерле гамәл 10,2 мең гектардан артып китте. Шул ук вакытта бер ел элек бу күрсәткеч 6 мең гектар гына иде.

“Яшә, урман!” россиякүләм акциясе чараларында 1,4 миллионнан артык кеше катнашты. 2017 елда ул сәяси, мәдәни һәм иҗтимагый элита вәкилләрен, фән эшлеклеләрен, сәнгать һәм мәдәният хезмәткәрләрен, дәүләт хакимияте органнары вәкилләрен һәм Россия Федерациясендә яшәүче аңлы гражданнарны берләштерде.

Татарстан Республикасы Урман хуҗалыгы министрлыгы яңа ел бәйрәмнәренә Татарстан Республикасының 31 урманчылыгы буенча урман фонды территориясендә урнашкан чыршыларны һәм (яисә) ылыслы башка токым агачларын әзерләү өчен урман утыртмаларын сату-алу шартнамәләре төзүгә хокук сату буенча 2017 елның 2 ноябрендә булып узган аукцион йомгаклары турында хәбәр итә.

31 лот буенча аукцион узмаган дип танылды (РФ УК 80 статьясының 7 пунктындагы 1 пунктчасы). Аукциондагы бердәнбер катнашучылар белән беркетмәләр имзалана һәм аукцион нәтиҗәләре турында “Интернет” мәгълүмати-телекоммуникация челтәрендә Россия Федерациясе рәсми сайтында мәгълүмат урнаштырылган көннән соң ун көн узгач шартнамәләр төзелә.