ЯҢАЛЫКЛАР
"Шәһәр яны урманчылыгы" ДКУ мәктәп урманчылыгы җитәкчесе Ләйсән Хәйруллина "Росинка" балалар бакчасында тәрбияләнүче балалар өчен "Урман дәресе" уздырды. Бүген балалар янгын чыгу куркынычы янаган чорда урманда үзеңне ничек тотарга, агачны ничек утыртырга кирәклеге турында, шулай ук мәктәп урманчылыклары турында белде. Дәрес барышында балаларда экологик үзаң формалаштыруга нигезләнгән программалар белән тәрбиячеләр чыгышы каралды. Шулай ук мәктәп һәм мәктәпкәчә яшьтәге балалар табигать саклау тематикасына җырлар, шигырьләр һәм кыска театральләштерелгән чыгышлар ясады. Сүз уңаеннан, Авиатөзелеш районының Кадыш поселогында урнашкан 22 номерлы "Росинка" балалар бакчасы экологик һәм табигать саклау тематикасына юнәлеш алган. Балаларда кече яшьтән үк әйләнә-тирә мохиткә һәм урман ресурсларына сакчыл караш тәрбиялиләр.
Иҗтимагый советның чираттагы утырышы Татарстан Республикасы Урман хуҗалыгы министрлыгының Ветераннар советы әгъзасы Е.А.Гуськов рәислегендә узды. Утырышта урман корылышы, урман торгызу, урман-орлыкчылык һәм питомник хуҗалыгына бәйле темалар күтәрелде.
Бүген министр Равил Кузюров рәислегендә Татарстан Республикасы Урман хуҗалыгы министрлыгы фәнни-техник советының киңәйтелгән утырышы булды. Әлеге чара – урман хуҗалыгында фәнни якын килү белән гамәли белемнәрнең синтезы ул. Биредә урманчылык технологиясендәге заманча алымнарның өстенлекләре турында сөйләштеләр. Утырыш эшендә Көнчыгыш-Европа урман сынау станциясе вәкилләре, КФУ һәм КДАУ галимнәре, урман хуҗалыгы ветераннары, ТР Урман хуҗалыгы министрлыгы аппараты белгечләре һәм ведомство буйсынуындагы "Урманчылык" учреждениеләре вәкилләре катнашты.
Утырыш барышында биотехнологияләргә зур игътибар юнәлтелде. Асылда, "Өйрәнү-сынау Саба урман хуҗалыгы" ДБУ Татарстан Республикасы урманнарында заманча методларны кулланып, иенке каенның югары продуктлы формаларын сайлап алу темасын белдерде. Шулай ук башка перспективалы темалар һәм фәнни-җитештерү эшләнмәләре турында, шул исәптән "in-vitro клоннары колекциясе – Татарстан Республикасы урманнарында сайлап алынган сабаклы имәннең кыйммәтле генотипларын булдыру" хакында да сөйләштеләр. Әлеге программа плюс агачларын ачыклауга, алга таба аннан сыйфатлы утырту материалы үстерү өчен әлеге агачларның биоматериалын сайлап алуга юнәлдерелгән. Әлеге проектны эшләү Татарстанның урман фондын яхшыртуга ярдәм итәчәк.
"Татарстанда хәзерге вакытта өч плоидлы усак (клонлаштырылган) плантацияләре бар. Клонлаштырылган агачларны өйрәнү күрсәткәнчә, әлеге новаторлык ысулы югары җитештерүчәнлекле, суыкларга һәм төрле чирләргә каршы торучын утырту материалын үстерергә булыша. Өч плоидлы усак шулай ук үсеш дәрәҗәсе буенча да лидерлыкта, дип билгеләде үзенең чыгышында "Инвинтро" микроклональ вегетатив үрчем лабораториясе директоры урынбасары Н.А.Ханов.
Фәнни-җитештерү эшләнмәләреннән тыш, советта катнашучылар республикада кертү зарурлыгы булган актуаль юнәлешләр хакында да сөйләште. Утырыш барышында шулай ук "Татарстан Республикасында сабаклы имәннең һәм вак яфраклы юкәнең катнаш утыртмаларын саклау һәм оптимальләштерү" Россия-алман проектын тормышка ашыру кебек темаларга да тукталдылар.
Утырышны тәмамлап, Татарстан Республикасы урман хуҗалыгы министры Равил Кузюров конструктив даилог өчен барысына да рәхмәт белдерде һәм әлеге эшләнмәләрнең урман хуҗалыгында киң кулланылыш табачагына ышаныч белдерде.
2018 елның 28 маена карата ясалма урман торгызу эшләре тулысынча тәмамланды. Урман культуралары булдыру, катнаш рәвештә урман торгызу (бер кишәрлектә табигый һәм ясалма утыртмаларны катыштыру), урман культураларын тулыландыру, питомникларга орлык чәчү кебек эшләр башкарылды. Татарстанның 31 урманчылыгында урман культуралары булдыру эшләре тулы күләмендә гамәлгә ашырылды. Шулай ук эрозиягә каршы яклаучы урман утыртмаларын булдыру эше дә төгәлләнде.
Республикада язгы урман-культура эшләре календарь планы нигезендә башланган иде һәм язгы урман-культура сезонында оптималь агротехника чорында тәмамланды.
Зәй районының Якты күл авыл җирлегендә элеккеге чүплек полигоны территориясендә агачлар утыртылды. "Зәй урман хуҗалыгы" ДБУ хезмәткәрләре 4 гектардан артык җирне яшелләндерде. Элеккеге каты көнкүреш калдыклары полигоны Зәй шәһәреннән 15 чакрымда урнашкан. Әлеге чаралар экологик торышны яхшырту һәм рекультивация эшләре уздыру максатларында гамәлгә ашырыла. Бүген биредә ябык тамыр системасы белән Европа чыршысы һәм Себер карагачы утыртылды. Билгеләп узарга кирәк, әлеге территориядә әзерлек эшләре уздырылды, асылда грунт кертелде. Утырту материалы сыйфатында ябык тамыр системасы белән җитештерелгән үсентеләр кулланылды, чөнки аларны барча вегетация чорында утыртырга ярый.
"Әлмәт урманчылыгы" ДКУ хезмәткәрләре, "Альметьевнефть" НГТИ хезмәткәрләре белән берлектә, республиканың "Татарстанның чиста урманнары" табигать саклау акциясендә катнашты. Миңнебай кишәрлеге урманчылыгының 168 кварталында территория каты көнкүреш калдыкларыннан һәм төзелеш чүпләреннән арындырылды. Бу урындагы санкцияләнмәгән чүплекләр тулысынча тәртипкә китерелде, 12 куб. м. күләмендә калдыклар каты көнкүреш калдыклары полигонына чыгарылды. "Әлеге акциядә катнашып, без урманнардагы санитар-экологик торышны яхшыртабыз, моны аңлавы – күңелле", – дип билгеләде урманчылар.
Татарстан Республикасы Урман хуҗалыгы министрлыгында, график нигезендә, кече һәм урта эшкуарлык субъектларына урман утыртмаларын сату-алу шартнамәсе төзүгә хокук сату буенча аукцион үткәрелде. Барлыгы 3: Саба, Кызыл Йолдыз һәм Тәтеш урманчылыкларыннан 42 лот белдерелде.
Аукционда җиңүчеләр белән аукцион нәтиҗәләре турында беркетмәләр төзелә һәм, аукцион уздырылган көннән соң егерме көннән соңга калмыйча, сатуларның рәсми сайтында аукцион нәтиҗәләре турында мәгълүмат урнаштырылган көннән соң ун көн узгач һәм аукцион уздырылган көннән соң егерме көннән соңга калмыйча кече һәм урта эшкуарлык субъектларына урман утыртмаларын сату-алу шартнамәләре төзеләчәк.
Татарстан Республикасы урман хуҗалыгы министры Равил Кузюров көллиятнең мөгаллимнәр коллективын һәм студентларны яңа директор – Р.Ф. Фәхраҗиев белән таныштырды. Бу вазыйфага кадәр Рим Фазыл улы Кукмара районының Лубян авыл җирлеге башлыгы булып эшләгән иде.
Көллиятнең элеккеге директоры А.М. Данилов яңа эш урынына күчүгә бәйле рәвештә вазыйфасыннан азат ителде. Киңәшмәдән соң яңа билгеләнгән директор Р.Ф. Фәхраҗиев көллият коллективы белән планерка уздырды, биредә үзенең урынбасарлары белән агымдагы мәсьәләләр хакында фикер алышты һәм киләчәк перспектива өчен планнар билгеләде.
Мари Иле Республикасының 6 нчы "Яшь урманчы" мәктәп урманчылыгы әгъзалары Министрлыкның урман музеенда булдылар. Татарстанның атказанган урманчысы, музей директоры Илгиз Зарипов уздырган экскурсия кысаларында балалар Татарстан Республикасы урман хуҗалыгының барлыкка килүе, хәзерге торышы һәм үсеш перспективалары турында төшенчәләр алды. Төп эшлеклеләр, атказанган урман хуҗалыгы хезмәткәрләре, урман хуҗалыгына кадрлар әзерләү белән шөгыльләнүче белем бирү йортлары белән таныштылар. ТРның урманлы өлешенә, аның мәйданнары кимүенә китергән сәбәпләргә, урманнарның токым составына зур игътибар бирелде. Урман торгызу, тәрбияви кисү һәм агач әзерләү, урманнарны янгыннардан саклауны оештыру, шулай ук агач материалы эшкәртү технологиясе күрсәтелде. "Урманчы кордоны" почмагы һәм анда урын алган агач эшләнмәләре балаларда аеруча зур кызыксыну уятты.
Татарстан Республикасында мәктәп урманчылыклары эшен оештыруга һәм аларның казанышларына, мәктәп урманчылыкларындагы балаларның кул эшләнмәләренә һәм аларның иҗат эшчәнлегенә махсус игътибар бирелде.
"Музей директоры белән аралашу җылы, дустанә мөнәсәбәттә узды, предметлар һәм вакыйгалар турында кызыклы һәм үтемле итеп аңлатылды. Мондый музейлар, һичшиксез, мәдәни-белем бирү, табигать саклау һәм тәрбия бирү үзәге булып тора", – дип билгеләде Мари Иленнән мәктәп урманчылыгы вәкилләре.
Танышу сәфәре барышында Татарстан Республикасы урман хуҗалыгы министры "Аксубай урманчылыгы" ДКУ дәүләт урман фонды кишәрлекләрен карады, биредә урман торгызу эшләре уздырылган. Быелның язгы чорында санитар кисү урыннарында Европа чыршысы һәм гади нарат чәчкеннәре утыртылган. Равил Кузюров шулай ук урман фондының ике ел элек урман торгызу эшләре уздырылган кишәрлеген дә карады, агачларның үсеп китү дәрәҗәсе 80 процент тәшкил итә.
Соңрак Татарстан Республикасы урман хуҗалыгы министры "Биләр урманчылыгы" ДКУ һәм "Биләр урман хуҗалыгы" ДБУ тикшерде. Равил Кузюров урманчылык контораларын, урман кисү буенча эш цехларын һәм урман питомнигын карады. Министр шулай ук урман торгызу эшләре кишәрлекләре белән дә танышты. Язын әлеге урыннарда Татарстанның Урман селекция-орлыкчылык үзәгендә ябык тамыр системасы белән җитештерелгән ылыслы токым урман культуралары утыртылган. Хәзерге вакытта "Биләр урман хуҗалыгы" ДБУ хезмәткәрләре урман культураларын, күршеләрендәге иярчен (кирәкмәгән) үсемлекләр аларга комачауламасын өчен, механика ярдәмендә һәм кулдан тәрбияли. Равил Кузюров шулай ук "Инвитро" ысулы белән алынган өчплоидлы усак плантацияләрен дә карады. Әлеге агачлар элиталы усак клоннары булып тора.
Татарстан Республикасы урман хуҗалыгы министры урман хуҗалыгы һәм урманчылык хезмәткәрләре белән аралашты, башкарыла торган эшләрнең сыйфатына игътибар юнәлтергә кушты һәм алга таба уңышлы эш теләде.