ЯҢАЛЫКЛАР
Лубян урман-техника көллияте китапханәсендә ПДН хезмәткәрләре И.И. Җиһаншин, Г.Р. Айсина һәм Кукмара ҮРХ табиб-наркологы Р.М. Сабирҗанов катнашында балигълык яшенә җитмәгән 1 һәм 2 курс студентлары белән очрашу булды. Укучылар белән “Хокук бозуларны кисәтү. Тәмәке, алкоголь, наркотик, психотроп һәм башка төрле матдәләрне куллану нәтиҗәләре” темасына сөйләштеләр. Чараның максаты – балигълык яшенә җитмәгәннәрне кисәтү; хокукый белемнәрне пропагандалау; җаваплы карарга мөстәкыйль килү күнекмәләрен формалаштыру; катлаулы хәлләрне тәнкыйди анализлау күнекмәләрен формалаштыру; укучыларга бу гамәлне кылган чакта аларның Закон бозып кына калмыйча, шул ук вакытта үзләренең якыннарына һәм туганнарына авырлык китерүләре турында аңлату; төркемдә эшли алу, үз карашларыңны белдерү, гәп кора белү күнекмәләрен үстерү.
“Студентлар язы-2016” фестиваленең иң яхшы номерлары белән укучылар 2016 елның 24 ноябрендә Лубян урман-техника көллиятендә чыгыш ясадылар. Тамашачылар белән җанатарлар бик күп уңай тәэсирләр, чиксез, бетмәс-төкәнмәс энергия алдылар. Концерт программасын тәмамлап, директорның тәрбия эшләре буенча директоры Н.М. Сираҗетдинова яңа кабул ителгән студентларны котлады, аларга алга таба иҗади уңышлар теләде һәм “Студентлар язы-2016” фестиваленә йомгак ясады. Студентларга – фестивальдә катнашучыларга кыйммәтле бүләкләр һәм призлар тапшырылды.
Кыш ае кошлар һәм җанварлар өчен авыр вакыт. Буа районы мәктәпләрендә җимлекләр әзерләү буенча зур эш башкарыла. Буа шәһәренең № 1 УГБ мәктәбендә “Кышын кошларны ашатыгыз!” исеме астында акция булып узды, анда балалар үзләренең иң яхшы эшләрен – җимлекләрне, кошлар сурәте төшерелгән плакатларны күрсәттеләр. Акциягә “Зөя буйлары” ДТКТ белгечләре дә кушылды. Тыюлык коллективы үз эшчәнлегендә үсеп килүче яшь буында табигатькә карата сакчыл караш тәрбияләүгә зур игътибар бирә. Бу юнәлештәге эш дәвам иттереләчәк.
Быел “Яшел Россия” гомумроссия экология иҗтимагый хәрәкәте “Җиңү урманы” конкурсын үткәрүдә инициатор булды. Бу чараның максаты – Бөек Җиңү темасына гражданнарның кызыксыну дәрәҗәсен арттыру, кешеләрне бердәм милли идея белән берләштерү, гражданнарны патриот итеп тәрбияләү, Бөек Ватан сугышында катнашып һәлак булганнарны һәм тыл ветераннарын искә алу.
ТР Нурлат ш. 3 санлы ГБМ МАБУ мәктәп урманчылыгына “Җиңү урманы” экологик-патриотик проектын иң яхшы тормышка ашыруы нәтиҗәсендә икенче урынны бирделәр. Җитәкчеләре – Чибидина Татьяна Ивановна. Өченче урынга Ханты-Манси автоном округының Лянтор ш. конкурсантлары лаек булды. Беренче урынны исә Магадан ш. Магадан өлкәсе мәгариф үзәгенә бирделәр. Җиңүчеләрне 2016 елның 8 декабрендә Мәскәүдә көтәләр, анда тантаналы рәвештә бүләкләү чарасы узачак.
Бүген, 2016 елның 24 ноябрендә, Татарстан Республикасы Урман хуҗалыгы министрлыгына “Рослесинфорг” ФДБУ директоры Штрахов Сергей Николаевич килде. Очрашу барышында ведомстволарның үзара багланышлары һәм алга таба хезмәттәшлеге турында сөйләштеләр. Алмас Нәзиров Сергей Штраховны министрлыкның структур бүлекчәләре белән таныштырды, аннан соң алар Татарстан Республикасы урман хуҗалыгы музеенда булдылар.
2016 елның 22 ноябрендә Россия Федерациясе Президенты Владимир Путин, Гомумроссия халык фронтының “Гамәлләр форумы”нда чыгыш ясап, ГХФның экология һәм урманны яклау проблемалары буенча иҗтимагый мониторинг төркеменең шәһәр урманнарын саклауга юнәлдерелгән инициативасын хуплады.
ГХФ активистлары шәһәр урманнарының массакүләм кыскартылу мәсьәләсен күтәрде һәм аларны яклау буенча чаралар– шәһәр урманнарының бөтен мәйданнарын формалаштырылачак “яшел щит” составына кертү мөмкинлеген бирә торган закон нормаларын кабул итәргә, Урман кодексын “шәһәр урманнары” дигән киңәйтелгән комплекслы төшенчә белән тулыландырырга тәкъдим иттеләр. ГХФ вәкилләре шулай ук табигатьне саклау өлкәсендә инспекторларның җитәрлек санда булмавы һәм нигезсез санитар кисүләр проблемаларын да күтәрделәр.
ГХФ вәкилләре сорауларына җавап биреп, Владимир Путин шәһәр урманнарын дәүләт күчемсез милек кадастрына кертү кирәклеге турында искәртте.
“Эш шунда ки, бу шәһәр урманнары әле дә дәүләт кадастрына кертелмәгән. Шуңа күрә алар белән теләсә кем ни теләсә шуны эшли. Кагыйдә буларак, бу урманнар инфраструктура объектларына якын урнашкан, анда төзү эшләрен башкару җиңелрәк. Бу урманнарны дәүләт кадастрына кертүгә ирешергә кирәк. Бу хөкүмәткә дигән тиешле документларда һәм йөкләмәләрдә рәсмиләштереләчәк. Шулай ук шәһәр урманнарын шәһәр парклары категориясенә кертү мөһим – ул вакытта аларны нәтиҗәле итеп һәм турыдан-туры, кичекмәстән диярлек якларга мөмкин булачак”, – дип ассызыклады Россия Президенты Владимир Путин.
Шәһәр урманнарының яклаулы статусын өстәмә рәвештә көчәйтү максатларында Россия Федерациясенең Табигый ресурслар һәм экология министрлыгы тарафыннан “Россия Федерациясе Урман кодексына урманнардан һәм урманнарның махсус яклана торган өлешләреннән файдалануны, аларны саклауны, яклауны, үстерүне җайга салуны камилләштерү өлешендә үзгәрешләр кертү турында” Федераль закон проекты эшләнгән, кызыксынган федераль органнар белән килештерелгән һәм Россия Федерациясе Хөкүмәтенә кертелгән.
Закон проекты, асылда, шәһәр урманнарын җайга салу буенча аерым статьяны бүлеп чыгара, шулай ук шәһәр урманнарында агачларны тоташ кисүләрне һәм аларда капиталь төзелеш объектларын урнаштыруны тыя.
2016 елның 03 июлендәге “Әйләнә-тирәлекне саклау турында” Федераль законга һәм Россия Федерациясенең аерым закон актларына урман-парклы яшел пояслар булдыру өлешендә үзгәрешләр кертү турында” № 353-ФЗ Федераль законда каралган урман-парклы яшел поясларны булдыру шәһәр һәм шәһәр яны урманнарын яклау буенча өстәмә механизм булып тора.
2016 елның 22 ноябрендә Гомумроссия халык фронтының “Гамәлләр форумы”нда ГХФ активистлары тарафыннан урман сагы, ау күзәтчелеге һәм Росприроднадзор инспекторларының җитәрлек булмавы турында мәсьәлә күтәрелде, шулай ук аларга хокук бозуларны теркәү һәм чикләү буенча капма-каршы вәкаләтләр бүлеп бирү тәкъдиме чыгарылды. Вәкаләтләрне өстәү буенча тиешле тәкъдимнәр Федераль урман хуҗалыгы агентлыгы тарафыннан әзерләнгән.
“Экспертлар белән берлектә, без бу вәзгыятьне “эшкәртеп”, урман сагы, ау күзәтчелеге, балык күзәтчелеге инспекторларына табигатьне яклау буенча вәкаләтләр бүлеп бирүне тәкъдим итәбез, бу бюджетка хилафлык китермичә табигатьне саклау инспекторларының штатын һәм әйләнә-тирәлекне яклау нәтиҗәлелеген арттырырга ярдәм итәчәк”, – дип мөрәҗәгать итте Россия Президентына Иркутск өлкәсендә ГХФның экология һәм урманны яклау проблемалары буенча төбәк иҗтимагый мониторинг төркеме координаторы Сергей Апанович.
“Тулысынча килешәм, моны эшләргә кирәк, моны хупларга риза”, – дип хуплады ГХФ активистларының тәкъдимен Владимир Путин.
Хәзерге вакытта урманда бер үк вакытта төрле учреждениеләрнең һәм ведомстволарның вазифаи затлары үз бурычларын үти, алар теге яки бу күзәтчелек төрен башкара.
“Мондый хәлдә һәр күзәтчелек вазифасы юнәлешендә гамәл кылучы хезмәткәрләрнең саны җитәрлек булмау хәлиткеч фактор булып тора. Күзәтчелек вазифаларын оптимальләштерү шартларында дәүләт урман инспекторларына хайваннар дөньясы объектларын һәм аларның тереклек итү тирәлеген саклау, контрольдә тоту һәм алардан файдалануны җайга салу өлкәсендә, шулай ук дәүләт ау инспекторларына урман мөнәсәбәтләре өлкәсендә адмнистратив хокук бозулар турында беркетмәләр төзү буенча вәкаләтләр бүлеп бирү тәкъдим ителә.
Шул ук вакытта бу тәкъдим гамәлдәге законнар кысасында, төбәкләрдә – губернаторларның карарлары нигезендә, ә федераль ведомство хезмәткәрләренә карата – РФ Административ хокук бозулар турында кодексына үзгәрешләр кертү юлы белән тормышка ашырылырга мөмкин. Смоленск, Оренбург, Пенза, Ульян, Мурманск, Псков, Калининград, Сахалин өлкәләрендә һәм Мордовия Республикасында мондый модель инде кабул ителде һәм тормышка ашырыла”, – диде Россия Федерациясе Табигый ресурслар һәм экология министры урынбасары – Федераль урман хуҗалыгы агентлыгы җитәкчесе Иван Валентик.
2016 елның 22 ноябрендә Россия Федерациясе Президенты Владимир Путин Гомумроссия халык фронтының “Гамәлләр форумы”нда чыгыш ясап, ГХФның экология һәм урманны яклау проблемалары буенча иҗтимагый мониторинг төркеменең дөрес булмаган урман патологиясе тикшеренүләре актлары нигезендә нигезсез санитар кисүләрне чикләүгә юнәлдерелгән инициативасын хуплады.
“Нәтиҗәле урман патологиясе бәяләмәләре, чыннан да, системалы проблема булып тора. Шуңа күрә безнең тәкъдим түбәндәгеләрдән гыйбарәт. Беренчедән. Агачларның авыруларына карата ялган бәяләмә ясаучы урман патологлары өчен җаваплылык карарга, шулай ук безнең законнарда шундый норма беркетергә кирәк, аның нигезендә санитар-савыктыру чаралары бары тик федераль хакимият органнары (мин Рослесхозны күздә тотам) белән килештергәндә генә үткәрелерлек булсын, бу органнар әлеге чараларны үткәргән өчен шундый ук җаваплылыкка ия булырга тиеш”, – дип мөрәҗәгать итте Россия Президентына Иркутск өлкәсендә ГХФның экология һәм урманны яклау проблемалары буенча төбәк иҗтимагый мониторинг төркеме координаторы Сергей Апанович.
ГХФ вәкиленең сорауларына җавап биреп, Владимир Путин әлеге проблеманың ил җитәкчелеге игътибарына инде берничә мәртәбә чалынуы хакында искәртте.
“Намуссыз урман патологларына килгәндә: әйе, чыннан да, бу безнең игътибардан читтә кала килде. Иң гадие, әгәр дә моның артында нинди дә булса фәнни, ә бу очракта ялган фәнни тикшеренүләр ята икән, – агач кисүгә рөхсәт алу. Урман патологлары дип аталучы затларның үз вазифаларын намуссыз үтәгәне өчен яки чын мәгълүматларны максатчан үзгәрткәннәре өчен җаваплылык карау өлешендә мин Сезнең белән килешәм. Боларның барысын да тәгаен карарга һәм мондый җаваплылыкны кертергә кирәк. Риза”, – дип ассызыклады Россия Президенты Владимир Путин.
2016 елның 16 ноябрендә Россия Федерациясе Хөкүмәтенең 2016 елның 12 ноябрендәге “Урман мөнәсәбәтләре өлкәсендә аларга тапшырылган Россия Федерациясе вәкаләтләрен гамәлгә ашыручы Россия Федерациясе субъектларының вәкаләтле дәүләт хакимияте органнары тарафыннан расланган урман патологиясе тикшеренүләре актларында каралган урманнарның санитар һәм урман-патологик торышы турындагы белешмәләрнең дөреслеген һәм чараларның нигезле булуын контрольдә тоту турында нигезләмә”не раслый торган № 1158 карары рәсми басылып чыкты. Норматив-хокукый акттагы нигезләмәләрнең төп максаты законлылыкны арттырудан, урманнарда санитар кисүләрне билгеләгәндә явызларча файдалану мөмкинлеген һәм хаталарны булдырмаудан гыйбарәт.
“Агачларны законсыз, вәхшиләрчә юкка чыгарганда иң куркынычы – көчсез булу. Гаепле затлар өчен билгеләнгән җәзаның һәлак ителгән агачларны кайтара алмавы хаклы түгел. Моңарчы шулай булды. Хәзер агачларны бу хакта мәгълүмат төбәк хакимиятләре сайтларында басылып чыкканнан соң 20 көн узгач кына кисә алачаклар. Текстта актның номеры, кишәрлек урманчылыгының, кварталның, бүлемтекнең аталышы һәм белгечнең билгеле бер киңәшләре, шул исәптән санитар кисүләр турында мәгълүматлар була.
Күптән түгел кабул ителгән 455 санлы законда санитар кисүләрне контрольдә тоту эшендә җәмәгатьчелекнең катнашу мөмкинлеге беркетелде. Һәм хәзер урман дәүләтнең һәм гражданлык җәмгыятенең икеләтә контролендә булачак.
Әгәр дә сез санитар кисүләрнең хокуклы булу-булмавында шикләнәсез икән, дәшмичә калмагыз. Рослесхозга, округтагы Урман хуҗалыгы департаментына электрон мөрәҗәгатьләр языгыз. Анда кемнең нинди хокук буенча кисүен ачыкларлар. Ләкин, иң мөһиме, агачлар исән калыр, ә гаеплеләр җәза алыр”, – дип билгеләде Россия Федерациясе Табигый ресурслар һәм экология министры урынбасары – Федераль урман хуҗалыгы агентлыгы җитәкчесе Иван Валентик.
“Арча урман хуҗалыгы” ДБУ учреждениесендә Татарстанның урман тармагында эшләүчеләргә үзагач әзерләү процессын оештыру, урманнарны саклау, яклау һәм үстерү, хезмәтне һәм куркынычсызлык техникасын саклау эшләрен үткәреп күрсәттеләр. Татарстан Республикасы урман хуҗалыгының министр Алмас Нәзиров җитәкчелегендәге вәкилләре Сорнар кишәрлеге урманчылыгы мәйданында булдылар, биредә семинарда катнашучыларны урман әзерләү комплекслары (харвестер+форвардер) ярдәмендә тоташ санитар кисүләрне башкару эшләре һәм, агач тарттыру җайланмасы булган МТЗ-82 тракторыннан файдаланып, урманнарны карап тоту кисүләрен башкару технологиясе белән таныштырдылар. Балтач кишәрлеге урманчылыгында аларга, кварталларга аеру ысулы белән, урманны тәрбияләү кисүләрен башкару өчен урман бүлемтеген аерып чыгару технологиясен күрсәттеләр. Тукай кишәрлеге урманчылыгында урман белгечләре урманны карап тоту кисүләре башкарылган җирләрне карадылар. Моннан тыш, урманчыларга Лесхоз гомуми белем бирү мәктәбе базасында мәктәп урманчылыгының ни рәвешле актив эш алып барганлыгын күрсәттеләр.
“Арча урман хуҗалыгы” ДБУ учреждениесендә булып узган семинар-киңәшмә кысаларында Татарстан Республикасының урман хуҗалыгы министры Алмас Нәзиров урман тармагындагы иң яхшы хезмәткәрләргә бүләкләр тапшырды. “Мамадыш урман хуҗалыгы” ДБУ директоры Мөхәммәтшин Илдус Газиҗан улы Федераль урман хуҗалыгы агентлыгының Мактау грамотасына ия булды. “Арча урман хуҗалыгы” ДКУ баш бухгалтеры Закирова Гүзәлия Идрис кызы, “Арча урман хуҗалыгы” ДКУ бухгалтеры Шәвәлиева Илсияр Гаяз кызы, “Арча урман хуҗалыгы” ДКУ баш инженеры Габдуллин Фидарис Фәнәвил улы Татарстан Республикасы Урман хуҗалыгы министрлыгының Мактау грамоталарын алды. Агач аударучылар арасында “Урман кисүче - 2016” IV Россия чемпионатын оештыруда һәм үткәрүдә гамәли ярдәм күрсәткәннәре өчен Татарстан Республикасы урман хуҗалыгы министры ярдәмчесе Гомәров Раил Рафаил улына; мөлкәт белән идарә итү, техник үсеш һәм хезмәт сагы бүлегенең әйдәүче консультанты Нурмөхәммәтов Рамил Рәсим улына; мәгълүмат технологияләрен үстерү секторының әйдәүче консультанты Мортазин Илнур Рафикъ улына Рәхмәт хатлары тапшырылды.