ЯҢАЛЫКЛАР
Тантаналы линейкада Татарстан Республикасы урман хуҗалыгы министры Равил Кузюров Татарстан Республикасы Президенты Рөстәм Миңнеханов исеменнән көллият студентларын һәм мөгаллимнәрне яңа уку елының башлануы белән котлады. Хәбәрдә болай диелә: “Белем көне – ул яшенә һәм социаль статусына, милләтенә һәм диненә бәйсез рәвештә, һәркем өчен бәйрәм”. Министр үзеннән шәхсән булачак урманчыларга яңартылган Лубян урман-техника көллиятендә уңышлы гына белем алуларын теләде. “Урманчы һөнәре – бик мөһим һәм әһәмиятле. Студентларга тиешенчә укуларын телим, үз уңышларыгыз белән мөгаллимнәрегезне сөендерерлек булсын!” – дип ассызыклады Равил Кузюров. Татарстан Республикасы Президенты Рөстәм Миңнеханов ярдәмендә көллияттә белем алу һәм уңайлы яшәү өчен барлык шартлар да тудырылган.
Тантаналы линейкада шулай ук Кукмара муниципаль районы башлыгы Сергей Димитриев та катнашты. “Лубян көллияте студентлары төрле ярышларда һәм “World Skills” чемпионатында шактый уңышлар яулады. Бу күп нәрсә хакында сөйли. Киләчәк ышанычлы кулларда, димәк. Һәрнәрсәдә уңышлар сезгә!” – дип билгеләде Сергей Димитриев.
Белем йорты директоры Рим Фәхраҗиев беренче курсларга соңгы елларда Лубян көллиятендә урман тармагына белгечләр әзерләү өчен күп кенә эшләр башкарылуы турында сөйләде.
Көллиятнең иң яхшы студентлары, шулай ук Татарстан Республикасы Мәктәп урманчылыкларының икенче слеты волонтерлары Мактау грамоталары белән бүләкләнде.
4 сентябрь көнне 10.00 сәгатьтә Татарстан Республикасы Министрлар Кабинетында Татарстан Республикасы урман хуҗалыгы министры Р.Ә.Кузюров катнашында "Урман атнасы-2018" республика табигать саклау акциясен уздыру" темасына брифинг булачак. Брифинг кысаларында быелның 8 аенда Министрлык эшчәнлегенә йомгак ясау планлаштырыла.
Татарстан территориясендә урман законнары бозылуны чикләү максатында "Идел буе урманчылыгы" ДКУ хезмәткәрләре ТР ЮХИДИ хезмәткәрләре белән берлектә "Агач ташучы машина" операциясе кысаларында ДПС "Тула1" станционар постында һәм "Кама" КПП агач материалы һәм пиломатериаллар ташуга рөхсәт документларын тикшерү буенча рейд уздырды.
Рейд барышында агач һәм агач кисү материалларын ташучы 5 транспорт чарасы тикшерелде. Быелның 8 аенда "Агач ташучы машина" ведомствоара оператив-профилактика чараларын уздыру кысаларында Татарстан Республикасы буенча барлыгы 23 административ эш рәсмиләштерелде.
Татарстан Республикасы Урман хуҗалыгы министрлыгында, график нигезендә, кече һәм урта эшкуарлык субъектларына урман утыртмаларын сату-алу шартнамәсен төзүгә хокук сату буенча аукцион үткәрелде. Барлыгы 7: Идел буе, Яшел Үзән, Кайбыч, Мамадыш, Алабуга, Арча һәм Лениногорск урманчылыкларыннан 105 лот күрсәтелде.
Аукционның бердәнбер катнашучылары белән аукцион нәтиҗәләре турында беркетмәләр төзелә һәм, аукцион уздырылган көннән соң егерме көннән соңга калмыйча, сатуларның рәсми сайтында аукцион нәтиҗәләре турында мәгълүмат урнаштырылган көннән соң ун көн узгач һәм аукцион уздырылган көннән соң егерме көннән соңга калмыйча кече һәм урта эшкуарлык субъектларына урман утыртмаларын сату-алу шартнамәләре төзеләчәк.
Татарстан Республикасы урман хуҗалыгы министры Равил Кузюров "Баулы урманчылыгы" ДКУ һәм "Баулы урман хуҗалыгы" ДБУ тикшерде. Объектларны карау эшендә шулай ук Баулы муниципаль районы башлыгы Рамил Гатиятуллин да катнашты.
Равил Кузюров урманчылык конторасын, агач эшкәртү буенча эш цехларын, азкомплектлы бригада тарафыннан урманны тәрбияви кисү кишәрлекләрен карады, 2018 елда уздырылган урман торгызу эшләренең сыйфаты белән танышты. Шулай ук урман питомнигы да каралды.
Равил Кузюров урман питомнигының сыйфатына игътибар итте һәм урман хуҗалыгы хезмәткәрләренә алга таба эшләрендә нәтиҗәлелек һәм уңышлар теләде. Язгы урман культуралары чорында Баулы урманчылыгы урман фондында 35 гектарда гади нарат утыртылган.
Бүген "Баулы урман хуҗалыгы" ДБУ бинасында Баулы урман хуҗалыгында берничә ел урман кисүче булып эшләгән урманчы, Советлар Союзы Герое Гаврил Петрович Евсеевка мемориал такта ачылды.
Тантаналы чарада Татарстан Республикасы урман хуҗалыгы министры Равил Кузюров, Баулы муниципаль районы башлыгы Рамил Гатиятуллин, Татарстан Республикасы урман хуҗалыгы ветераннары, Баулы урманчылыгы хезмәткәрләре, Геройның кызы Нина Гаврилова катнашты.
Потапово-Томбарлы авылында туган, миномет полкы дивизионы командиры сугыштан соң туган районында яши һәм эшли, күп еллар буе җаваплы вазыйфаларны били: район советы башкарма комитетында, "Победа" колхозы рәисе булып, соңыннан урман хуҗалыгында эшли. Татарстан Республикасы урман хуҗалыгы министры Равил Кузюров үзенең чыгышында Геройга мемориал такта ачу инициативасына теләктәшлек белдергән һәркемгә рәхмәт сүзләрен җиткерде. Шулай ук хәзерге вакытта урман тармагы торышы турында сөйләде.
"Урман һөнәренә ия булмаган кешенең урманчы булып эшләве – аны бары тик яхшы яктан гына сыйфатлый, ул табигатьне һәм туган төбәген яраткан. Урман хуҗалыгы өчен Советлар Союзы Героеның бездә эшләве – зур дәрәҗә. Ә минем өчен әлеге чарада катнашуым зур дәрәҗә. Яшь буыннар өчен үгет-нәсыйхәт: горурланыгыз, үрнәк алыгыз! Урман хуҗалыгына мәктәп урманчылыкларында катнашучыларны һәм мәктәп укучыларын күбрәк китерсеннәр иде, әлеге күренекле шәхеснең тормышы мисалында кешенең үз Ватанын һәм урманны никадәр яратуы турында сөйләсеннәр, күрсәтсеннәр иде", – дип билгеләде Равил Кузюров.
Гаврил Евсеев Көнбатыш, 2 нче һәм 1 нче Белорусь, 3 нче һәм 1 нче Балтыйк буе фронтларында көрәшкән. Дүрт тапкыр яраланган. Берлин стратегик операциясе барышында аеруча аерылып торган. Сугыш тәмамланганда Берлинда майор исемендә артиллерия дивизионы командиры була.
СССР Югары Советы Президумының 1945 елның 31 маендагы Указы белән алманнарга каршы көрәш фронтында команда бирүчеләрнең хәрби биремнәрен үрнәк үтәгән өчен һәм бу вакытта батырлык һәм геройлык күрсәткән өчен Евсеев Гаврил Петровичка Ленин орденын һәм "Алтын Йолдыз" медален тапшырып, Советлар Союзы Герое исеме бирелә. Моннан тыш, ул ике Хәрби Кызыл байрагы орденнары, 2 дәрәҗә Ватан сугышы, Кызыл йолдыз орденнары һәм сигез медаль белән бүләкләнә.
Республика урманчылары 2019 елгы урман культуралары өчен туфрак әзерләү эшенә кереште. Яшел Үзән, Кайбыч, Кама, Кызыл Йолдыз, Мамадыш, Шәһәр яны, Саба һәм Чирмешән урман хуҗалыклары белгечләре әлеге эшне беренчеләрдән булып уздыра башлады. Урман культуралары өчен урман кишәрлеген әзерләү алдагы барлык технологик операцияләрне сыйфатлы башкару өчен шартлар тудыру максатында гамәлгә ашырыла. 2018 елда 1495 гектарда туфрак әзерләү эшен башкару планлаштырыла.
Равил Кузюров "Алабуга урманчылыгы" ДКУ һәм "Алабуга урман хуҗалыгы" ДБУ эшләр торышы белән танышты. Министр утырту материалы үстерү буенча урман питомнигын карады. Әлеге питомник Татарстандагы иң зурларының берсе булып санала, аның мәйданы 18 гектар тәшкил итә. Биредә урман хасил итүче төп токымнардан гайре Кырым нараты, япон спиреясе һәм магония кебек сирәк төрләр дә бар. Сәфәре барышында министр "Түбән Кама" милли паркы объектларын карады.
Объектларны караганнан соң Равил Кузюров урманчылык һәм урман хуҗалыгы хезмәткәрләре белән киңәшмә уздырды, анда учреждениеләрнең финанс-хуҗалык эшчәнлегенә һәм республиканың урман хуҗалыгын кадрлар белән тәэмин итүгә кагылышлы мәсьәләләр каралды.
Бүген Татарстан Республикасы урман хуҗалыгы министры "Алабуга" МИЗ территориясендәге "Кастамону Интегрейтед Вуд Индастри" ҖЧҖ заводында булды. Равил Кузюров төрек компаниясе вәкилләре белән очрашты һәм агач эшкәртү заводына китерелә торган агач материалына бәя билгеләү мәсьәләләре буенча эшлекле киңәшмә уздырды.
Исегезгә төшерик, МДФ плитәләр җитештерүче завод "Алабуга" махсус икътисад зонасы территориясендә 2013 елда гамәлгә кертелде, бу исә файдалануга исәпләнгән диләнкене үзләштерү, урман хуҗалыгында керемне арттыру, агачларны яңарту һәм Татарстан Республикасы урманнарында табигый составны яхшырту өлешендә яхшы ярдәм булды.
2018 елның 23 августында Кукмара шәһәрендә Татарстан Республикасы Президенты Рөстәм Миңнеханов катнашында мәгариф һәм фән хезмәткәрләренең август конференциясе узды. Эшлекле сәфәре кысаларында Президент "А.М.Булатов исемендәге күп профильле лицей" МБМУ каршындагы мәйданчыкта урнашкан "Лубян урман-техника көллияте" ДБҺББУ күргәзмә экспозициясен карады, күргәзмә белән Татарстан Республикасы урман хуҗалыгы министры Равил Кузюров таныштырды. Президентка Лубян көллиятенең казанышлары турында сөйләделәр. Студентлар "Ландшафт дизайны" компетенциясе буенча "World Skills"ның бакыр призерлары булып тора. Рөстәм Нургалиевичка шулай ук көллият тормышы турында сөйли торган мастер-класслар: гербарийлар кулланып дендрология дәресе, заманча геодезия җиһазлары белән эш итү, сабактан сәнгатьле эшләнмәләр әзерләү, агач буенча бизәкләп кисү, бүрәнәле кисентене яру технологияле күрсәтелде.
Бүгенге көндә Лубян урман-техника көллияте Татарстанда урман тармагы өчен квалификацияле һәм сорала торган белгечләрне әзерләп чыгаручы бердәнбер урта һөнәри белем бирү йорты булып тора.
Хәзерге вакытта көллияттә 2018 елгы кабул итү кампаниясе дәвам итә. Укыту эше дүрт юнәлеш буенча алып барыла: "Урман һәм урман-парк хуҗалыгы", "Бакча-парк һәм ландшафт төзелеше", "Икътисад һәм бухгалтерия исәбе", "Аучылык белеме һәм җәнлек үрчетү". 97 еллык тарихында Лубян урман хуҗалыгы техникумы урман хуҗалыгы өчен 9 меңнән артык белгеч әзерләп чыгарды. Карап чыгуын төгәлләгәннән соң Татарстан Президенты Рөстәм Миңнеханов министрга уңышлар, ә көллияткә студентларны 100 процент дәрәҗәсендә туплауны теләде.