ЯҢАЛЫКЛАР

Урман хуҗалыгы ветераннары һәм инвалидлары елына 8 куб метр күләмендә ташламалы утынга исәп тота ала. Әлеге акция "Түбән Кама урман хуҗалыгы" ДБУ коллектив шартнамәсе нигезендә социаль партнерлык максатларында уздырыла.

 Урман хуҗалыгында эшләп инвалидлык яки картлык буенча пенсиягә чыккан хезмәткәрләрнең гаризасы нигезендә, эш стажына бәйсез рәвештә, аларга агач материалы һәм коры-сары бушлай бирелә, ә утын Татарстан Республикасы законнарында билгеләнгән нормалар буенча ташламалы шартларда җибәрелә.

31 март көнне Казанның Шәһәр яны урманчылыгында ел саен уза торган “Татарстан урманнарын саклыйк!” конкурсында катнашучыларны бүләкләү тантанасы узды. Чараны ачып, Татарстан Республикасы урман хуҗалыгы министры урынбасары Рәис Гомәров болай дип билгеләде: “Конкурста катнашучыларның саны елдан-ел арта бара, мин моңа бик шат. Әлеге күренеш безнең балаларыбызның Татарстан табигатен яклауга һәм саклауга битараф булмавы турында сөйли”.

“Татарстан урманнарын саклыйк!” конкурсында Казаннан һәм Кукмарадан мәктәп укучылары һәм балалар бакчаларында тәрбияләнүче балалар катнашты. Быел эшләр саны рекордлы иде – 1143 рәсем һәм кул эшләре тапшырылды. Ел дәвамында яшь табигать сөючеләр конкурска берничә номинация буенча материаллар юллады, алар арасында тикшеренү һәм иҗат эшләре бар иде.

Иң кызыклы һәм оригиналь материаллар ТР Урман хуҗалыгы министрлыгы, Казан шәһәре Мәгариф идарәсе һәм “Шәһәр яны урманчылыгы” ДКУ мактау грамоталары белән билгеләнде. 365 номерлы балалар бакчасында тәрбияләнүче Дарья Гермонова, 84 нче мәктәп укучысы Азалия Закирҗанова, “Заречье 8а” балаларга өстәмә белем бирү үзәге укучысы Алия Фазылҗанова, 65 нче балалар бакчасына йөрүче Михаил Татаринов, 181 нче мәктәпнең 1А сыйныфында белем алучыларның, 124 нче мәктәп укучысы Анна Михалева, 8 нче мәктәпнең 3 нче сыйныфында белем алучы Екатерина Печерская һәм 65 нче мәктәпнең 7 нче сыйныфында укучы Лия Некрасова эшләре аеруча зур игътибарга лаек булды. Барлыгы исә 100гә якын укучы призлар һәм дипломнар белән бүләкләнде.

"Минзәлә урманчылыгы" ДКУ белгечләре елына берничә мәртәбә мәктәп укучылары өчен төрле чаралар уздыра – яхшы гадәт буенча сыерчык оялары урнаштырыла. Кагыйдә буларак, биредә мондый акцияләр белән Халыкара кошлар көнен каршы алалар, ул 1 апрельдә билгеләп үтелә.

Урманчылар балаларны урман паркларының берсенә чакырдылар һәм урманның кеше тормышындагы роле, урманда тереклек итүче кошлар турында сөйләделәр.

Хезмәт дәресләрендә балалар укытучылары белән бергә кошлар өчен 20 данә күләмендә оя ясаган. Сыерчык оялары өчен материаллар белән урманчылар тәэмин иткән.

 – Без кош ояларын элеп кенә калмадык, ә урман тормышы, анда тереклек итүчеләр турында да күп кенә кызыклы әйберләр белдек. Саф һавада мондый дәресләр күбрәк булсын иде, – дип уртаклашты үзләренең хис-кичерешләре белән балалар.

Иң кызыксынучан һәм кошлар турында иң күп мәгълүмат белүче укучылар бүләкләр һәм яшь урманчы истәлекләре алды. Урманчылар мондый дәресләр заяга узмагандыр дип өметләнә. Һәм киләчәктә балалар алган белемнәрен туган төбәк табигате файдасына куллана алыр, дип ышана.

2013 елдан бирле “Алабуга” махсус икътисад зонасында “Кастамону Интегрейтед Вуд Индастри” төрек компаниясе тарафыннан түбән товарлыклы агач материалын эшкәртү проекты республиканың урман хуҗалыгы өчен өстенлекле булып тора. Урманны тәрбия кылу кысаларында “Урман хуҗалыгы” дәүләт бюджет учреждениеләрендә әзерләнгән агач материалы алга таба эшкәртү һәм МДФ җитештерү өчен “Кастамону Интегрейтед Вуд Индастри” ҖЧҖ заводына җибәрелә.

Заводны эксплуатациягә кертү түбән товарлыклы агач материалына ихтыяҗ базарын тудырачак, бу исә Татарстан Республикасында урманнарның агачларын яңарту һәм токым составын яхшырту буенча иң әһәмиятле урман хуҗалыгы бурычларын хәл итәргә булыша.

Хәзерге вакытта Министрлыкның ведомство буйсынуындагы учреждениеләрдә ылыслы, шулай ук яфраклы токым орлыклары стратификация максатларында кар өемнәренә күмелә. Күп кенә агачларның орлыкларының үзенчәлекләре шунда ки, алар каты тыгыз тышча белән капланган, ә ул суны начар үткәрә. Нәтиҗәдә орлыклар бик акрын һәм таркау тишелә. Шуңа бәйле рәвештә агач үсемлекләрен орлыкларны стратификацияләмичә генә үстерүе катлаулыга туры килә.

Орлыкларны стратификацияләү – орлыкларны чәчүгә әзерләү ысулларының берсе булып тора, аның төп максаты булып шытып чыгу сәләтен арттыру. Орлыклар берникадәр вакытка, бер айдан алып бер елга кадәр, салкын дымлы тирәлеккә урнаштырыла. Билгеле бер температуралар, дым һәм һава йогынтысы астында орлыкларның тышчалары йомшара һәм шытымнар барлыкка килә. Шуннан соң тишелгән орлыклар махсус субстратка утыртылырга тиеш.

Әлеге эш даими урман питомнигы булган һәр урман хуҗалыгында башкарыла. Татарстанда шундый 50 питомник бар.

Равил Кузюров Казанның Ленин бакчасындагы халык мемориалына чәчәкләр салды. Бөтен Россия буйлап Кемеровода фаҗигале рәвештә һәлак булганнар рухына багышлап, матәм акцияләре уза. 

25 мартта Кемерово шәһәренең "Зимняя вишня" сәүдә-күңел ачу үзәгендә булган янгын нәтиҗәсендә кешеләрнең фаҗигале рәвештә һәлак булуына бәйле рәвештә, ТР урман хуҗалыгы министры Равил Кузюров бүген Аппарат киңәшмәсен бер минут тынлык белән башлап җибәрде. Россия Федерациясе Президенты Указы нигезендә 2018 елның 28 март көне Россия Федерациясендә илкүләм матәм көне итеп игълан ителде.

Россия Федерациясе Хөкүмәтенең 28.02.2018 №АХ-П9-1100 йөкләмәсен үтәү максатында Идел буе федераль округы буенча Урман хуҗалыгы департаменты тарафыннан Татарстан Республикасы Урман хуҗалыгы министрлыгының 2018 елгы янгын чыгу куркынычы янаган сезонга әзерлеге буенча планнан тыш тикшерү уздырылды.

Тикшерү барышында ачыкланганча, Россия Федерациясе субъектларының 2018 елда янгын чыгу куркынычы янаган чорга әзерлеген бәяләү критерияләре буенча, урман-янгын формированиеләренең исәбе һәм махсуслаштырылган урман-янгын техникасы һәм җайланмалары саны урманнарда янгын чыгу ихтималын булдырмый калуда чараларны вакытында күрү һәм аларга каршы нәтиҗәле көрәшү өчен, Татарстан Республикасы территориясендә кешеләрнең иминлеген, икътисад һәм халыкның яшәешен тәэмин итүче объектларның тотрыклы эшләвен тәэмин итүгә әзер.

"Тәтеш урманчылыгы" ДКУ хезмәткәрләре, ТР ЭЭМ һәм ТР ЮХИДИ белән берлектә, "Агач ташучы" оператив-профилактика операциясе кысаларында рейд уздырды. Максаты – гамәлдәге законнарны бозучыларны тоту һәм район территориясендә һәм аннан читтә законсыз әзерләнгән агач материалын транспорт белән күчерү каналларын ябу. Рейд Тәтеш муниципаль районының Олы Тархан һәм Килдеш авылларында узды.

Рейд барышында агач кисү материалларын ташучы дүрт транспорт чарасы тикшерелде. Тикшерү нәтиҗәсендә административ хокук бозу турында эш кузгатылды.

Татарстан Республикасы Урман хуҗалыгы министрлыгы Нурлат урманчылыгы урман фонды территориясендә урнашкан кече һәм урта эшкуарлык субъектларына урман утыртмалары сату-алу шартнамәсе төзүгә хокук сату буенча 2018 елның 27 мартында уздырылган аукцион йомгаклары турында хәбәр итә.

№ 18, 21, 67 лотлар буенча аукцион узган дип танылды. Аукционда җиңүчеләр белән аукцион нәтиҗәләре турында беркетмәләр имзалана һәм аукцион нәтиҗәләре хакында Россия Федерациясе рәсми сайтында мәгълүмат урнаштырылган көннән соң ун көн узгач кече һәм урта эшкуарлык субъектларына урман утыртмалары сату-алу шартнамәләре төзеләчәк.

№ 1-10, 13-17, 19, 20, 22-26, 28, 29, 31, 35, 39, 41-43, 45-47, 50-52, 54-66 лотлар буенча аукцион узмаган дип танылды (Россия Федерациясе Урман кодексының 80 статьясының 7 пунктындагы 1 пунктчасы). Аукциондагы бердәнбер катнашучы белән аукцион нәтиҗәләре турында беркетмәләр төзелә һәм, аукцион уздырылган көннән соң егерме көннән соңга калмыйча, "Интернет" мәгълүмат-телекоммуникация челтәрендә Россия Федерациясе рәсми сайтында аукцион нәтиҗәләре турында мәгълүмат урнаштырылган көннән соң ун көн узгач кече һәм урта эшкуарлык субъектларына урман утыртмалары сату-алу шартнамәләре төзеләчәк. 

№ 11, 12, 27, 30, 32-24, 36-38, 40, 44, 48-49, 53 лотлар буенча аукционда катнашуга заявкалар килмәде, Татарстан Республикасы Урман хуҗалыгы министрлыгының аукцион комиссиясе аукционны узмаган дип тану турында карар кабул итте.