ЯҢАЛЫКЛАР

"Кәләй урманчылыгы" ДКУ хезмәткәрләре "Кәләй урман хуҗалыгы" ДБУ белән берлектә масштаблы җыештыру эшләрен уздырды. Чара "Татарстанның чиста урманнары" акциясе кысаларында оештырылган иде. Кәләй т/ю станциясе поселогында яшәүчеләр дә урманны чистарту эшенә кушылды. Бота кишәрлеге урманчылыгының 108 номерлы кварталы очраклы гына сайланмаган иде. Әлеге урман территориясе поселокка орынып тора, намуссыз кешеләр биредә каты көнкүреш калдыкларын турыдан-туры чокырга урнаштырып, чүплекләр урнаштыра. Массакүләм җыештыру барышында урман биләмәсе чистартылды, ә чүпләр каты көнкүреш калдыклары полигонына озатылды. Бу көнне урманчылар шулай ук җирле халык белән урманнарда санитар-экологик нормаларны бозуның ярамаганлыгы турында әңгәмәләр дә уздырды. 

"Тәтеш урманчылыгы" ДКУ хезмәткәрләре иҗтимагый оешмаларның активистлары һәм волонетрлар белән берлектә Кама Тамагы муниципаль районында Антоновка авылы янәшәсендә 1000 данә күләмендә төп урман хасил итүче токым чәчкеннәрен утыртты. Агачларны Идел елгасының яр буе зонасын яшелләндерү максатларында буш торган урыннарга утырттылар. Табигать саклау акциясенә җирле халык та актив теләктәшлек белдерде. Чарага өлкәннәр дә, балалар да килде, Келәр кишәрлеге урманчылыгының урман остасы Илһам Гәрәев агачны үсеп китсен өчен ничек дөрес утыртырга кирәклеге турында сөйләде. "Биредә безнең кул белән утыртылган урман үсәчәк", – дип сөенде балалар, чәчкеннәрне утыртканда.

Республикада "Агач ташучы машина" операциясе уза – дәүләт урман инспекторлары ТР буенча ЮХИДИ хезмәткәрләре белән берлектә агач материаллары һәм үзагач ташу буенча рөхсәт документларын тикшерүгә бәйле рейдлар уздыра. "Зәй", "Аксубай", "Лубян", "Саба", "Әлмәт", "Болгар", "Алабуга", "Яшел Үзән" урманчылыклары хезмәткәрләре урман законнары бозылуны чикләү максатында мобиль һәм стационар ЮПХ постларында үзагач һәм агач материалы ташуга рөхсәт документларын тикшерү буенча рейдлар уздырды. Рейд барышында агач һәм агач кисү материалларын ташучы 24 транспорт чарасы тикшерелде. Тикшерү нәтиҗәсендә урман законнары бозылуның ике факты ачыкланды.

Быелгы ел барышында 25 бозу факты ачыкланды – болар агач материалларын һәм үзагачны урман законнарында билгеләнгән тәртиптә рәсмиләштерелгән рөхсәт документларыннан тыш, шулай ук ЛесЕГАИС системасында сату-алу турында килешүләрне теркәмичә транспорт белән ташу очраклары.

Мондый очракларда вазыйфаи затларга административ штраф күләме утыз мең сумнан илле мең сумга кадәр, юридик затларга биш йөз мең сумнан җиде йөз мең сумга кадәр тәшкил итә. Шул ук вакытта агач материаллары да конфискацияләнә. Закон буенча транспорт чарасы да конфискацияләнергә мөмкин, чөнки "административ хокук бозу коралы" булып тора.

Сатып алынган агач материалының законлы булу-булмавын Интернетта – ЛесЕГАИС  системасындагы rosleshoz.gov.ru сайтында тикшереп карарга була – бу агач материалын һәм аның белән алыш-бирешләрне исәпкә алуның бердәм мәгълүмат системасы. Агачларны законсыз кисү яки башка төрле хокук бозулар турында урман сагының турыдан-туры номеры – 8(800)100-94-00 буенча хәбәр итәргә була.

“Кама урманчылыгы” ДКУ һәм “Кама урман хуҗалыгы” ДБУ хезмәткәрләре Чистайдагы урман биләмәләрен тиешле санитар торышка китерде. Чара Чистай кишәрлеге урманчылыгы урман фондында узды. Табигать саклау акциясендә җирле халык актив катнашты – урман территориясен чистарту эшенә барлыгы 65 кеше кушылды. Ике сәгать эчендә урманчылар халык белән берлектә 5 гектар мәйданда урман буйлап ташланган каты көнкүреш калдыкларын җыеп алды. Барлыгы 30 капчык тирәсе чүп җыелды – пыяла һәм пластик шешәләр, полиэтилен пакетлар, резин шиннар. “Җирле халыкның әлеге акциягә теләктәшлек белдерүенә без бик шат, бу бит чистайлыларда актив гражданлык позициясе бар, алар урманнардагы чисталыкны саклау мәсьәләсенә битараф түгел, дигәнне аңлата”, – дип билгеләде урманчылык хезмәткәрләре.

“Татарстанның чиста урманнары” акциясе барча республика буйлап 15 ноябрьгә кадәр дәвам итәчәк.

Татарстан Республикасы Урман хуҗалыгы министрлыгы матбугат хезмәте.

Карта, йөгерү һәм җиңүгә омтылу. “Лубян урман-техника көллияте” ДБҺББУ узган ял көннәре кызыклы һәм мавыктыргыч булды. Биредә спорт ориентациясе буенча ярышлар узды. Студентлар карта ярдәмендә көллият территориясеннән минималь вакыт эчендә контроль пунктларны эзләде. Беренче курс студентлары конкурста актив катнашты. Ярышлар ярдәмендә аны оештыручылар төп максатка иреште – студентлар җирлектә юнәлеш алу күнекмәләрен үстерде. Шул рәвешле беренче курс студентлары үзләре өчен күп кенә кызыклы әйберләр белде, көллиятнең яңартылган инфраструктурасы белән танышты. Шулай ук үзләренең физик ныклыгын үстерде, чөнки балаларга йөгерергә күп туры килде. Җиңүчеләрне грамоталар һәм кыйммәтле призлар белән бүләкләделәр.

19-21 сентябрь көннәрендә Екатеринбургта “Урман кисүче-2018” алтынчы Россия чемпионаты булды. Ярышларда Россиянең төрле төбәкләреннән 24 команда катнашты. Барлыгы 72 агач аударучы көч сынашты. Чемпионат кысаларында урман әзерләүче машиналарның – харвесторларның һәм форвардерларның операторлары арасында да ярышлар булды. Агач аударучылар түбәндәге дисциплиналарда ярышты: агач аудару, чылбыр алмаштыру, төгәл кискәләү, катнаш кисем белән кискәләү, сабаклар кисү һәм командалы эстафета. Машина операторлары: агач аудару, кисүче аппаратның чылбырын алмаштыру, бүрәнә кискәләү. Татарстан Республикасыннан “Нурлат урман хуҗалыгы” ДБУ һәм “Саба урман хуҗалыгы” ДБУ агач аударучылары катнашты. Ярышлар нәтиҗәсендә Татарстан Республикасы командасы команда зачетында дүртенче ел рәттән беренче урынны яулады. Руслан Николаев харвестер операторлары арасындагы абсолют беренчелектә 1 урынга лаек булды. Фидаил Адиев юниорлар арасында – 1 урын. Олег Алексеев “ботаклар кисү” дисциплинасында – 1 урын, “төгәл кискәләү” – 3 урын, абсолют беренчелектә – 4 урын. Николай Гришаков “агач аудару” дисциплинасында – 2 урын, абсолют беренчелектә – 5 урын. Александр Мортазин “катнаш кисем белән кискәләү” дисциплинасында – 3 урын.

Бүген "Казан ярминкәсе" КҮдә "Чиста су. Казан" махсус күргәзмәсе һәм конгрессы уза, анда галимнәр, башкарма хакимият органнары белгечләре, экологик оешмаларның вәкилләре һәм урманчылар Иделне саклау мәсьәләләре хакында фикер алышу өчен җыйналды. Үзенең чыгышында Татарстан Республикасы урман хуҗалыгы министрының беренче урынбасары Әмир Бәдертдинов Идел, Чулман елгалары һәм аларның кушылдыклары буйлап яр буе саклык полосаларын утырту әһәмияте турында ассызыклады. Хәзерге вакытта Татарстандагы су саклаучы урман утыртмаларының мәйданы зур түгел. Үз чиратында, Татарстан урманчылары тарафыннан быелгы елда Арча һәм Биектау районнарында елгалар буйлап 59 гектардан артык мәйданда шундый агачлар утыртылды. Яр буе саклык полосалары – ул суга пычратучы элементлар, сәнәгый һәм каты көнкүреш калдыклары эләгүдән саклау өчен ясалма барьер. Министр урынбасары шулай ук яклагыч утыртмаларны булдырганда табигый составын җитди сакларга кирәклеге турында да искәртте, ә атап әйткәндә, яфраклы токымнар һәм куаклыклар утыртырга кирәк. Татарстан Республикасы Урман хуҗалыгы министрлыгының ведомство буйсынуында торган учреждениеләр тиешле финанслау булганда һәм җир кишәрлекләре бирелгәндә су саклаучы агач-куаклыкларны утырту эшләрен башкарырга әзер.

"Чиста урман миннән башлана!!!" – Кама Тамагы районында мәктәп укучылары катнашында урман территориясен җыештыру эше шундый шигарь астында узды. Җыештыруны "Тәтеш урманчылыгы" ДКУ Келәр кишәрлеге урманчылыгында оештырдылар. Чара "Татарстанның чиста урманнары" республика табигать саклау акциясе кысаларында узды. 8 һәм 9 сыйныф укучылары үзләренең кураторы – урманчылыкның урман остасы белән берлектә, чисталык урнаштыру һәм тиешле санитар торышка китерү өчен, урман кашагына чыктылар. Балалар сыйныф җитәкчеләре белән берлектә территорияне көнкүреш калдыкларыннан арындырды, корыган ботакларны алып чыгып, зур күчләргә өеп куйдылар. Урманнарны чыбык-чабыктан чистарту эшенә дә хәйран вакыт китте. "Бүген урман фондын чистарту буенча уздырыла торган чаралар барыннан элек укучыларда табигатькә сакчыл караш формалаштыруга һәм әйләнә-тирә мохитне саклауга юнәледергән булуын махсус ассызыкларга кирәк", – дип билгеләде Келәр кишәрлеге урманчылыгының урман остасы Илһам Гәрәев.

Балалар халыкның табигатькә булган карашының яхшы якка үзгәрүенә сөенә, ә урманнарга сакчыл мөнәсәбәт формалаштыру – укытучылар һәм ата-аналар бурычы.

2018 елның 19-21 сентябрь көннәрендә Сверлау өлкәсенең Екатеринбург шәһәрендә урман аударучылар, харвестерлар һәм форвардерлар арасында Россиянең VI "Урман кисүче-2018" чемпионаты уза. 30 якын команда ярышларда катнашу теләген белдергән, моннан тыш, ярышларга Финляндиядән дә юниорлар килергә планлаштыра.

Урман аударучылар арасында Россиянең VI "Урман кисүче-2018" чемпионатында катнашучылар ярышлар тарихында иң зур приз фонды – 4.5 млн сум өчен көч сынашачак. Ике көн дәвамында урман аударучылар шәхси һәм төркем зачетларында ярышачак.

Россиянең "Урман кисүче-2018" чемпионатында Татарстан Республикасы командасында Нурлат урман хуҗалыгыннан урман аударучылар һәм Саба урман хуҗалыгыннан урман әзерләү машиналарының операторлары катнаша.

Чемпионат GRAND EXPO-URAL тармак күргәзмәләре атнасы белән бер вакытта узачак, бу исә өстәмә профессиональ аудиторияне ике чарага да җәлеп итәчәк. GRAND EXPO-URAL кысаларында Урман һәм агач эшкәртү сәнәгате өчен машиналарның, җайланмаларның һәм технологияләрнең халыкара LESPROM-URAL Professional күргәзмәсе булачак, ул Урал-Себер төбәгендә тармак профессионаллары өчен иң зур чара.

“Татарстанның чиста урманнары” табигать саклау акциясенең көзге өлеше старт алды. “Бөгелмә урманчылыгы” ДКУ хезмәткәрләре аны “Ютазы УБМ” МБМУ учреждениесендә “Урманны сакла” темасына балалар иҗат конкурсын игълан итеп, башлап җибәрергә булды, биредә мәктәп укучылары үзләренең фантазиясен эшкә җиңде. Балалар урманның экологиягә булган әһәмияте, кешенең үз-үзен әхлаксыз тотышы урманга нинди зыян салырга мөмкин булуы турында шигырьләр сөйләде. Чара азагында мәктәп укучыларына һәм урамдагы кешеләргә урманнарда янгын куркынычсызлыгы кагыйдәләре белән листовкалар таратылды. Янгын куркынычы янаган чор азагына якынлашса да, урман янгыннарын булдырмый калу темасы актуаль булып кала.